![](img/news/46/73/06/default.jpg)
Չինաստանում Համաշխարհային ցանցի օգտվողների թիվը հասել է 802 միլիոնի, 2018 թվականի միայն առաջին կեսին այն ավելացել է 3.8 տոկոսով կամ 29.68 միլիոն մարդով: Այս մասին հաղորդվում է Չինաստանի տեղեկատվական ինտերնետ կենտրոնի (CNNIC) զեկույցում:
Զեկույցի համաձայն համացանցի հասանելիություն ունի Չինաստանի բնակչության 57.7 տոկոսը: Բջջային ինտերնետից օգտվում է 788 մլն մարդ. երկրի ինտերնետ օգտվողների ընդհանուր թվի 98.3 տոկոսը: 2017-ի վերջին այս ցուցանիշը հասել էր 97.5 տոկոսի, հաղորդում է «ՌԻԱ Նովոստին»:
Միեւնույն ժամանակ, համակարգչից կամ նոութբուքից ցանցին միացող օգտվողների թիվը 2017 թվականի վերջի համեմատ նվազել է 4.1 եւ 1.3 տոկոսով համապատասխանաբար:
Բջջային վճարումներ կատարող մարդկանց թիվը նույնպես աճում է: Եթե 2017 թվականի վերջին նման վճարումներն օգտագործել է ինտերնետ օգտագործողների 65.5 տոկոսը, ապա 2018-ի հունիսի վերջին այդ ցուցանիշը հասել է 71.9 տոկոսի:
Ժամանցային հավելվածների շարքում չինացիների շրջանում ամենատարածվածը կարճ տեսանյութերով հավելվածներն են, դրանցից օգտվում է ինտերնետ օգտագործողների 74.1 տոկոսը:
Չինաստանում կառավարության ծառայություններից համացանցի միջոցով օգտվում է 470 մլն մարդ՝ ընդհանուր օգտագործողների 58.6 տոկոսը: