Ռուսաստանը Միքայել Հարությունյանին Հայաստանի իշխանություններին չի արտահանձնի: Մոսկվան պաշտոնական հայտ է ստացել Երեւանից՝ ԱՊՀ երկրների միջպետական հետախուզման մեջ գտնվող Հայաստանի պաշտպանության նախկին նախարարին արտահանձնելու վերաբերյալ. նրան, հիշեցնենք, Մարտի 1-ի գործով երկրում սահմանադրական կարգը տապալելու մեղադրանք է առաջադրվել: Ռուսական կողմը դեռ քննարկում է հայտը, սակայն այն մերժելու նախնական որոշում է կայացվել: Պատճառաբանությունը հետեւյալն է. հաստատվել է, որ Միքայել Հարությունյանը 2002 թվականից ռուսական անձնագիր ունի, իսկ «Ռուսաստանի քաղաքացիները չեն արտահանձնվում օտարերկրյա պետություններին, այդ թվում՝ քրեական պատասխանատվության ենթարկվելու համար»: Ռուսաստանի եւ Հայաստանի իրավասու մարմինների նամակագրության մանրամասները հայտնի չեն:
Ռոբերտ Քոչարյանը մտադիր է մասնակցել Ազգային ժողովի արտահերթ ընտրություններին: Այս մասին Հայաստանի երկրորդ նախագահը հայտնել է Sputnik Արմենիա ռադիոկայանին տված հարցազրույցում: Մասնակցության ձեւաչափի մասին, սակայն, դեռեւս վաղ է համարում խոսել: Նախկին նախագահը կարծում է՝ կարող է դառնալ ընդդիմադիր բեւեռի կենտրոն կամ կենտրոններից մեկը: Իսկ որպես հենարան տեսնում է այն մարդկանց, որոնք հիշում են իր պաշտոնավարման տարիներն ու գնահատում այդ տարիների հաջողությունները, հատկապես՝ տնտեսական եւ արտաքին քաղաքականության ոլորտում:
Եվս մեկ անգամ անդրադառնալով իր դեմ հարուցված քրեական գործին՝ Քոչարյանն այն իրավաբանական աղբ է անվանել, իսկ ՀԱՊԿ գլխավոր քարտուղար Յուրի Խաչատուրովին մեղադրանք ներկայացնելն անհեռանկարային քայլ է որակել, որն արդեն մեծ վնաս է հասցրել կառույցում Հայաստանի հեղինակությանը:
Ինչ վերաբերում է հայ-ռուսական հարաբերություններին եւ Հայաստանի իշխանությունների կողմից պարբերաբար հնչեցվող հայտարարություններին, որ դրանք լավ մակարդակի վրա են. ասել է՝ եթե ամեն ինչ նորմալ է, ինչո՞ւ են անընդհատ փորձում արդարանալ: Ռոբերտ Քոչարյանը նաեւ կարծում է, որ բավարար չափով չի գնահատվում տարածաշրջանում ստեղծված իրավիճակը. առկա իրավիճակում, երբ տարածաշրջանում Հայաստանին բարեկամ երկրների նկատմամբ Արեւմուտքը նոր պատժամիջոցներ է կիրառում, իսկ հակառակորդ երկրներն ավելի անկանխատեսելի են դառնում, Քոչարյանի համոզմամբ, Հայաստանը պետք է հավատարիմ մնա իր դաշնակիցներին:
«Երկիր Ծիրանիի» շարքերը նոսրանում են. 4 անդամներ, այդ թվում՝ Երեւանի ավագանու փետրվարի նիստում Նուբարաշենից ապակե տարաներով բերված կոյուղաջրի միջադեպից հայտնի Մարինա Խաչատրյանը, հայտարարել են կուսակցությունից դուրս գալու որոշման մասին: Որոշման պատճառը, ըստ նրանց, կուսակցությունում խոսքի եւ գործի անհամապատախանությունն է: Մարինա Խաչատրյանից բացի՝ հայտարարությունը ստորագրել են նաեւ Խաչատուր Շահբազյանը, Կոնստանտին Ղարիբյանը եւ Աստղիկ Պետրոսյանը: Նրանք դուրս են եկել նաեւ Երեւանի ավագանու արտահերթ ընտրություններում «Երկիր Ծիրանիի» նախընտրական ցուցակից:
Ձորաղբյուրում կատարված ավազակային հարձակման մյուս 2 մասնակիցների ինքնությունը նույնպես պարզվել է: Իրավապահներն անուններ չեն հայտնում. նրանց առայժմ որոնում են: Օգոստոսի 28-ին դիմակավորված եւ զինված 3 անձինք ներխուժել էին Վճռաբեկ դատարանի նախկին նախագահ Արման Մկրտումյանի առանձնատուն: Մկրտումյանը որդու հետ դիմադրություն էր ցույց տվել՝ վնասազերծելով հարձակվողներից մեկին: Դեպքի վայր ժամանակ իրավապահները ձերբակալել էին Գյումրիի 42-ամյա բնակիչ Հովհաննես Ռիժենկոյին: Միջադեպի ժամանակ նախկին դատավորը հրազենային վնասվածքներ էր ստացել ու հիվանդանոց տեղափոխվել, սակայն հրաժարվել էր հոսպիտալացվել: Առանձնատան տարածքում «Կալաշնիկով» ինքնաձիգ, 16 փամփուշտ, ինչպես նաեւ սպորտային պայուսակ էին գտել, որի մեջ՝ լինգ եւ ինքնակպչուն ժապավեն:
Շենգավիթում 28-ամյա կնոջ սպանության գործով կասկածյալ կա. նա Աբովյան քաղաքի 38-ամյա բնակիչ է: Կասկածյալին ձերբակալել են: Երիտասարդ կնոջ դին գտել էին երեկ, Երեւանի Շենգավիթ վարչական շրջանի սեփական տներից մեկում: Մահացածի մարմնի վրա բռնության հետքեր են եղել: Դեպքի վայրի զննությամբ արնանման հետքեր, մատնահետքեր, երկու դանակ է հայտնաբերվել, որոնցից մեկը՝ արյունոտ: Քրեական գործով նախաքննությունը շարունակվում է:
Օգոստոսի 31-ը Ֆրեզնոյում Վիլյամ Սարոյանի օր է հռչակվել: Ֆրեզնոյի քաղաքապետն ասել է՝ այդպիսով քաղաքը հարգանքի տուրք է մատուցում այստեղ ապրած ու ստեղծագործած հանրահայտ գրողին: Ֆրեզնոյի քաղաքային խորհրդի նախագահն էլ կարեւորել է Վիլյամ Սարոյանի թողած գրական ժառանգության պահպանումը՝ հավելելով, որ Սարոյանն այն անհատներից է, որն ամբողջությամբ ներկայացնում է Ֆրեզնոյին հայ համայնքի արժեքները: Նշենք, որ այսօր՝ մեծանուն գրողի 110-ամյակին, ամերիկյան Ֆրեզնո քաղաքում դռներն է բացում Վիլյամ Սարոյանի տուն-թանգարանը: Տունը գնել, նորոգել եւ թանգարանի է վերածել բարերար Արթուր Ջանիբեկյանի «Ռենեսանս» հիմնադրամը: Նպատակ ունեն այն վերածել ստեղծագործական բուռն կյանքով ապրող մշակութային օջախի, որտեղ կկազմակերպվեն գրական երեկոներ, փառատոններ եւ այլ մշակութային միջոցառումներ:
Օգոստոսի 31-ին դոլարը շարունակել է թանկանալ, եվրոն էժանացել է: Դոլարի փոխարժեքը կազմել է 483 դրամ, եվրոյինը՝ 563, ռուբլունը՝ 7 դրամ 10 լումա, ֆունտինը՝ 628 դրամ:
Սեպտեմբերի 1-ին երեկոյան ժամերին հանրապետության հյուսիսային շրջաններում սպասվում է կարճատեւ անձրեւ եւ ամպրոպ: Օդի ջերմաստիճանը 3-4 աստիճանով կնվազի: Երեւանում վաղը տեղումներ չեն սպասվում: Մայրաքաղաքում գիշերը կդիտվի +19+21, ցերեկը՝ +32+34 աստիճան տաքություն:
