Հայաստանի համար Սիրիայի իրադրությունը վիթխարի նշանակություն ունի: Այս մասին Հայաստանի ԱԳ նախարար Զոհրաբ Մնացականյանը հայտարարեց Ֆրանկոֆոնիայի միջազգային կազմակերպության գլխավոր քարտուղար Միկաել Ժանի հետ համատեղ մամուլի ասուլիսում: «Սիրիայի իրադրությունը ահռելի նշանակություն ունի նաեւ տարածաշրջանում կայունության տեսակետից: Մեզ մտահոգում է մեր հայրենակիցների անվտանգության հարցը»,- շեշտեց նախարարը: Նա հիշեցրեց, որ Հայաստանն արդեն Սիրիայից մեծ թվով փախստականների է ընդունել, իսկ հայրենակիցներին սատարելու համար Դամասկոսում դեսպանատնից բացի, գործում է հյուպատոսություն Հալեպում: «Հայաստանը նաեւ բազմիցս Սիրիա հումանիտար օգնություն է ուղարկել»,- ընդգծեց նախարարը:
«Կարեւորագույններից մեկն է մնում մեր հայրենակիցների անվտանգության հարցը: Մեր գործընկերների հետ աշխատելիս մենք այս տրամաբանությամբ ենք առաջնորդվում»,- հայտարարեց Մնացականյանը՝ պատասխանելով ավելի վաղ բարձրաձայնված Սիրիայում հումանիտար առաքելությանը Հայաստանի մասնակցության գաղափարի մասին հարցին: «Անցյալում էլ է ՌԴ-ն Հայաստանին օգնել հումանիտար օգնությունը տեղ հասցնելու հարցում: Եվ այստեղ միասին կաշխատենք, որ կարողանանք հումանիտար ենթատեքստում տեղում օգնություն ցույց տալ»,- նշեց նախարարը:
Ավելի վաղ վարչապետ Նիկոլ Փաշինյանը հայտարարել էր Սիրիայում հումանիտար առաքելությանը Հայաստանի հնարավոր մասնակցության մասին: Առաքելության մանրամասները դեռեւս հայտնի չեն: