Ոստիկանության բոլոր գործողությունները եղել են օրենքի շրջանակներում, ոստիկանները գործել են օրենքով. ընթացքի մասին կտեղեկացնենք, փաստերն ուսումնասիրության մեջ են: Այս մասին, այսօր՝ սեպտեմբերի 23-ին, Երեւանի ավագանու ընտրություններին քվեարկելուց հետո լրագրողների հետ զրույցում ասաց ՀՀ ոստիկանապետը Վալերի Օսիպյանը՝ անդրադարձավ ԲՀԿ Աջափնյակի շտաբում Ոստիկանության կատարած գործողություններին: Նա ասաց, որ այդ շտաբում ընտրակաշառքը բաժանելու վերաբերյալ տեղեկությունների հարցով իրենց զբաղվում են, ուսումնասիրություններ են կատարվում, որոնց մասին կտեղեկացնեն:
Ինչ վերաբերում է նրան, որ ԲՀԿ քաղաքապետի թեկնածու Նաիրա Զոհրաբյանը հայտարարել էր, որ դա սուտ մատնություն է, ոստիկանությունը չի տիրապետում իրավիճակին, Օսիպյանն արձագանքեց. «Դա Նաիրա Զոհրաբյանի երեւակայությունն է, որ մենք չենք տիրապետում, Ոստիկանությունը տիրապետում է ողջ հայաստանյան լրատվության օպերատիվ իրավիճակին, եւ ցանկացած ահազանգ, գրառում, որ կատարվում է օգտատերերի կողմից, Ոստիկանությունը պարտադիր ուսումնասիրություն է կատարում։ Եթե հանցագործության մասին ահազանգ ենք ստանում, չգնա՞նք այդ ահազանգերի հետեւից»։
Անդրադառնալով ընտրակաշառքների մասին խոսակցություններին, ՀՀ ոստիկանապետն ասաց, որ կան հարուցված քրեական գործեր, ընթացքի մեջ են, համապատասխան վարույթ է իրականացվում։ Նա հրաժարվեց նշել, թե որ քաղաքական ուժերն են բաժանել ընտրակաշառք՝ նկատելով, որ դա կարող է դիտվել քարոզչություն կամ հակաքարոզչություն. «Երբ ընտրությունները կանցնեն, կանդրադառնանք: Այս պահի դրությամբ ամեն ինչ նորմալ է, ընտրությունները նորմալ են ընթանում, խախտումներ չեն արձանագրվել: Նախընտրական շրջանում չեն արձանագրվել կոպիտ խախտումներ: Ոստիկանությունն իրականացել է կանխարգելիչ աշխատանքներ: Ես դրական եմ գնահատում ոստիկանության աշխատանքը, այսօր էլ համապատասխան հրահանգավորումներ են եղել»: Նա սաց, որ Երեւանում չկան շրջաններ, որտեղ լարված են անցնցում ընտրությունները:
Ինչ վերաբերում է «Մեդիա կենտրոնում» տապալված ասուլիսին, երբ ԲՀԿ-ականները, ԱԺ պատգամավոր Վահե Էնֆիաջյանի գլխավորությամբ միջամտել ու խանգարել էին ասուլիսը, Օսիպյանն ասաց, որ ժամանակ չի ունեցել ու չի դիտել ասուլիսը, բայց եթե դիմեն ոստիկանությանը, իրենք կուսումնասիրեն:
Վերջում Օսիպյանը նշեց, որ քվեարկել է հանուն բարեկարգ, գեղեցիկ, օրինապաշտ Երեւանի։
Հիշեցնենք, որ Երեւանի ավագանու արտահերթ ընտրությունները մեկնարկել են այսօր՝ սեպտեմբերի 23-ին, առավոտյան ժամը 08.00-ին, եւ կտեւեն մինչեւ երեկոյան 20.00-ն: Երեւանի ավագանու ընտրություններին մասնակցում է 12 քաղաքական կուսակցություն ու դաշինք:
Խուզարկել են ԲՀԿ աջափնյակի գրասենյակը. Նաիրա Զոհրաբյանը պահանջում է Օսիպյանի հրաժարականը (վիդեո)
