Ռուսաստանի պաշտպանության նախարարությունը Facebook-ի իր էջում 3D-հոլովակ է հրապարակել, որում պատկերված է, թե ինչպես է խոցվել Իլ-20 հետախույզ օդանավը, փոխանցում է Lenta.ru-ն:
Տեսանյութում ցուցադրված է օդանավի երթուղին եւ նրա գտնվելու մոտավոր վայրը սիրիական ՀՕՊ համակարգի զենիթային հրթիռի խոցման պահին: Հոլովակում սխեմայով արտացոլված է նաեւ գնդակոծման պահին իսրայելական F-16 կործանիչների դիրքը. ըստ 3D-մոդելի՝ դրանք ռուսական օդանավը որպես քողարկում են օգտագործել:
Սեպտեմբերի 23-ին ՌԴ ՊՆ պաշտոնական ներկայացուցիչ Իգոր Կոնաշենկովը ճեպազրույց էր անցկացրել, որի ժամանակ ներկայացրել էր Իլ-20-ի կործանման օրը ռուս եւ իսրայելցի զինվորականների գործողությունների մանրամասները: Նա հայտարարել էր, որ Իսրայելի ՌՕՈՒ ներկայացուցիչները ռուսական կողմին մոլորության մեջ են գցել, իսկ իսրայելցի օդաչուների գործողությունները գնահատել էր որպես ոչ պրոֆեսիոնալ եւ անփույթ: Գեներալի խոսքով՝ Մոսկվան տեղի ունեցածի ամբողջ մեղքը դնում է Իսրայելի վրա:
Հիշեցնենք, որ սեպտեմբերի 18-ին ռուսական Իլ-20-ը խոցվել էր սիրիական ՀՕՊ համալիրի հրթիռով: Արդյունքում զոհվել էր 15 զինծառայող: