Հասարակության վերաբերմունքը ես կարող են գնահատել Երեւանի ավագանու ընտրություններով, որտեղ 80 տոկոսը ստացավ «Իմ քայլը» դաշինքը. սա ես համարում եմ ժողովրդի վերաբերմունքը հեղափոխությունից հետո: Այս մասին, այսօր՝ սեպտեմբերի 26-ին, ԱԺ-ում լրագրողների հետ զրույցում նշեց ՀՀԿ խմբակցության պատգամավոր, ՀՀ նախկին ոստիկանապետ Ալիկ Սարգսյանը:
Նրա խոսքով, այդ ամենը գնահատելի է, հասկանալի է, պատճառաբանված է. «Դա պարզ է, ու ինչքան էլ փորձեմ մանիպուլյացիաներով դա այլ կերպ ձեւակերպել, խոսքերը հետ ու առաջ տանեմ, դրա իմաստը չկա: Բայց այս մթնոլորտը, որ պետք է համատարած հայհոյանք լինի, որ ես ՀՀԿ-ի անդամ եմ, սա կարծում եմ՝ բարոյական չէ եւ շատ սխալ է»,-ասաց նա:
Ալիկ Սարգսյանն առաջարկեց հիշել 1991 թվականին Լեւոն Տեր-Պետրոսյանի ընտրությունը եւ դրան հաջորդած իրադարձությունները, այդ թվում 1996 թվականի տեղի ունեցածը. «Պետք չի այս ամենով այդքան ոգեւորվել ու մարդկանց վիրավորել»:
«Այո, ՀՀԿ-ն վերջին տարիներին, բնականաբար, իր կուրսից շեղվել է, ես դա մի քանի անգամ ասել եմ»,-ասաց նախկին ոստիկանապետը:
Հարցին, թե կարո՞ղ է դուրս գա ՀՀԿ-ից, նա պատասխանեց. «Ինձ մոտ դա այնքան հարաբերական է: Էդ որ մնացել եմ, դա հատուկ էսպես զոմբիացած վիճակ չի, որ մնացել եմ: Ես սպասում եմ՝ տեսնեմ ինչ է լինում, դա էլ հանուն մեր երկրի, հանուն մեր վաղվա օրվա: Սպասում եմ՝ հասկանամ, թե մեր երկիրը որ ուղիով է գնում:
Ես իմ ՀՀԿ շարքերում լինելով որեւէ մեկին վնաս չեմ տալիս, որեւէ ակցիա չեմ ձեռնարկում: Գրում եք՝ միացել է սրան, միացել է նրան, այդպիսի բան չկա, սուտ է»:
Իսկ ընդհանրապես քաղաքականությունից դուրս գալու մասին էլ ասաց. «Շատ հնարավոր է, ձգտում եմ, սպասում եմ օր շուտ»:
