Իսրայելի վարչապետ Բենիամին Նեթանյահուն հայտարարել է, որ Սիրիայում 15 ռուս զինվորականներով ռուսական Իլ-20-ի կործանումը, ինչում ՌԴ պաշտպանության նախարարությունը մեղադրում է Իսրայելի օդուժին, կարող էր «ավելի լուրջ» հետեւանքներ ունենալ: Այս մասին նա ասել է ԱՄՆ նախագահ Դոնալդ Թրամփի հետ հանդիպումից հետո ճեպազրույցի ժամանակ, հաղորդում է ՌԲԿ-ն՝ հղում անելով Kan հեռուստաալիքին:
«Ռուսական ինքնաթիռի կործանումը կարող էր ավելի լուրջ հետեւանքներ ունենալ», - ասել է Իսրայելի վարչապետը: Նա չի մանրամասնել, թե ինչի մաիսն է խոսքը: Ճեպազրույցում նա հաստատել է, որ «վերջին իրադարձություններից հետո» նա քննարկել է Ռուսաստանի կողմից Սիրիային C-300 զենիթահրթիռային պաշտպանության համակարգի փոխանցումը: Նեթանյահուն ընդգծել է, որ այս հարցը շատ կարեւոր է Իսրայելի անվտանգության համար:
Իր հերթին, հրատարակության աղբյուրը հաղորդում է, որ ԱՄՆ-ից վերադառնալուց հետո Իսրայելի վարչապետը մտադիր է խոսել Ռուսաստանի նախագահ Վլադիմիր Պուտինի հետ:
Ռուսական Իլ-20-ը ոչնչացվել էր սեպտեմբերի 17-ին Միջերկրական ծովի երկնքում՝ Խմեյմիմ օդակայան վերադառնալու ժամանակ: Հենց այդ ժամանակ Իսրայելի F-16 կործանիչները հարձակվել էին Սիրիայի տարածքի վրա:
ՌԴ պաշտպանության նախարարությունը ավելի ուշ հայտարարել էր, որ Իլ-20-ին հարվածել է Սիրիայի ՀՕՊ-ը եւ մեղադրել իսրայելցի օդաչուներին, որոնք «դիտավորությամբ վտանգավոր իրավիճակ են ստեղծել»: