Լոմոնոսովի անվան Մոսկվայի պետական համալսարանի Երեւանի մասնաճյուղում հոկտեմբերի 1-ին տեղի ունեցավ «Հայ-ռուսական ռազմական եղբայրություն. երեկ, այսօր, վաղը» թեմայով համաժողով:
Համաժողովին ելույթ ունեցան Հայաստանում Ռուսաստանի, Ղազախստանի եւ Բելառուսի արտակարգ եւ լիազոր դեսպանները:
Հայաստանում Ռուսաստանի դեսպան Սերգեյ Կոպիրկինն ընդգծեց, որ հայ եւ ռուս ժողովուրդների ընդհանուր պատմությունը, ինչպես նաեւ պետական կապերը, որոնք գոյություն ունեն եւ զարգանում են մինչ օրս, խորհրդանշում են երկու երկրների դաշնակցային եւ ռազմավարական հարաբերությունները:
«Ինձ հատկապես հաճելի է, որ այսօրվա համաժողովը տեղի է ունենում այստեղ՝ Լոմոնոսովի անվան Մոսկվայի պետական համալսարանի Երեւանի մասնաճյուղի պատերում՝ Հայաստանի ամենադինամիկ եւ խոստումնալից բուհերից մեկում», - ընդգծեց դեսպանը:
Դիվանագետի խոսքով, Ստալինգրադում խորհրդային զինվորների սխրանքը պատերազմի բեկման գործընթացի սկիզբը դրեց՝ ոչ միայն ռազմաքաղաքական, այլ նաեւ հոգեբանական իմաստով: Ստալինգրադի հաղթանակը համաշխարհային պատմական նշանակություն ունեցավ, քանի որ ցրվեց գերմանական ֆաշիստական զորքերի անհաղթելիության մասին առասպելը:
«Գուցե այդ պատճառով Ստալինգրադի ճակատամարտը հիմնական մարտերից մեկն է, որը առանձնահատուկ են հիշում ամբողջ աշխարհում: Աշխարհի բազմաթիվ քաղաքներում եւ մայրաքաղաքներում կան Ստալինգրադի անվան փողոցներ:
Դե իսկ, Հայաստանում լավ գիտեն, որ Ստալինգրադի ճակատամարտում հաղթանակը խափանեց Գերմանիայի դաշնակից Թուրքիայի` խորհրդային Հայաստանի վրա հարձակվելու ծրագրերը, ինչը նույնպես շատ կարեւոր պատմական նշանակություն ունեցավ»,-ասաց Հայաստանում Ռուսաստանի դեսպանը՝ հավելելով, որ անհրաժեշտ է համախմբել ուժերը՝ խորհրդային ազատագրող զինվորների սխրանքի նսեմացումը թույլ չտալու համար, ինչպես նաեւ պատմության կեղծման եւ նացիզմի հերոսականացման փորձերին հակազդելու նպատակով: