Արդեն ակնհայտ է, որ հատկապես խափանման միջոցը փոխելու հարցով պահանջը խիստ հասունացած է, միանգամայն արդարացի է եւ դա ոչ միայն կոնկրետ Պավել Մանուկյանի կամ Արմեն Բիլյանի պահանջն է, այլ ամբողջ ժողովրդի պահանջն է: Այս մասին «Սասնա Ծռերի» գործով դատական նիստում հայտարարել է Վարուժան Ավետիսյանը:
Նա մասնավորապես, հայտարարել է.
«Իրավիճակ է փոխվել Հայաստանում, շարունակում է փոխվել ու այդ փոփոխությունը պետք է արձանագրվի: Եթե այդ փոփոխությանը համապատասխան որոշումներ չկայացվեն, ապա մենք կունենանք անցանկալի իրավիճակներ ամեն առումներով, թե’ հոգեբանական, թե’ ներքին լարումներ, թե’ ընդհանրապես ժողովրդի հույսի եւ հավատի անկում, եւ այլ կարեւոր որակական գործոնների կորուստներ, որոնք էապես կվնասեն մեր ազգային անվտանգությանը եւ մեր առաջընթացին:
Այդ պատճառով ես հորդորում եւ խնդրում եմ նախ Պավել Մանուկյանին եւ Արմեն Բիլյանին չգնալ ծայրահեղ քայլի եւ իմանալ, որ դա ամբողջ ժողովրդի պահանջն է, եւ հորդորում եմ նաեւ Ձեզ`դատավարության մյուս մասնակիցներին (դատախազություն եւ դատարան), որ ավելի լայն համատեքստի մեջ նայեն այս երեւույթին, քան թե ուղղակի որպես քրեադատավարական գործընթացի մի բաղադրիչի»:
