Հանրապետության մի շարք մարզերում այսօր կայացած ՏԻՄ ընտրություններին ժամը 20:00-ի դրությամբ քվեարկելու իրավունք ունեցող 217,708 քաղաքացուց քվեարկությանը, նախնական տվյալներով, մասնակցել է 94.222 ընտրող կամ ընտրելու իրավունք ունեցողների 43.28 տոկոսը:

Մասնավորապես, Հայաստանի 4 քաղաքներից 3-ում քաղաքապետի ընտրություններում սենսացիոն ցածր ակտիվություն է գրանցվել: Չնայած վարչապետի պաշտոնակատար Նիկոլ Փաշինյանը ակտիվորեն աջակցում էր իր թեկնածուներին Էջմիածին եւ Արմավիր քաղաքներում՝ հայտարարելով, որ պետք է թավշյա հեղափոխությունը հասցնել ավարտին, արձանագրվել է ընտրողների մասնակցության շատ ցածր ցուցանիշ:

ԿԸՀ տվյալներով, ընտրատեղամասերը փակվելու պահին՝ ժամը 20.00-ին, Էջմիածնում ընտրություններին մասնակցել է 45278 ընտրողներից 15826-ը, ինչը կազմում է ընտրողների 34,95 տոկոսը։
Էլ ավելի ցածր ցուցանիշ է արձանագրվել Արմավիր քաղաքում, որտեղ ժամը 20։00-ի դրությամբ 28699 ընտրողներից քվեարկել է 9937-ը կամ ընտրողների 34,62 տոկոսը։

Հրազդան քաղաքում 44154 ընտրողներից ժամը 20-ի դրությամբ քվեարկել է 16259-ը, ինչը կազմում է ընտրողների 36,82 տոկոսը։

Այսպիսով, անկախության տարիներից ի վեր առաջին անգամ Հայաստանի մարզերում ՏԻՄ ընտրություններում արձանագրվել է ավելի ցածր ակտիվություն, քան ավանդաբար պասիվ մայրաքաղաքում:

Հիշեցնենք, որ սեպտեմբերի 23-ին կայացած Երեւանի ավագանու ընտրություններին մասնակցել էր ընտրողների 43,65 տոկոսը:

Այսօր բացառություն է կազմել Կապան քաղաքը, որտեղ 34969 ընտրողներից քվեարկությանը մասնակցել է 19503-ը, որը կազմում է ընտրողների 55,77 տոկոսը:

Փորձագետների կարծիքով, դա պայմանավորված է նրանով, որ Կապանը վերջերս դարձել է խոշորացված համայքն՝ իր մեջ ներառելով հարակից գյուղերը, որոնք ավելի ակտիվ են մասնակցում ընտրությունների:

Այս 4 քաղաքներում համայնքի ղեկավարների արտահերթ ընտրություններ նշանակվեցին այն բանից հետո, երբ կամավոր-պարտադիր սկզբունքով նախկին քաղաքապետները հրաժարական տվեցին, որոնց առաջադրել էր ՀՀԿ-ն: Ընտրությունների նախնական արդյունքները հայտնի կլինեն կեսգիշերից հետո: