Աննապադեպ երևույթ է, երբ երկրի վարչապետն անձամբ պաշտպանում է որևէ թեկնածուի և այդ թեկնածուն չի հաղթում ընտրություններում։ Այս մասին այսօր՝ հոկտեմբերի 22–ին ֆեյսբուքյան ուղիղ եթերում հայտարարեց ՀՀ վարչապետի պաշտոնակատար Նիկոլ Փաշինյանը՝ անդրադառնալով Կապան համայնքի ղեկավարի ընտրությունների արդյունքներին։
«Սա ժողովրդավարության մեծագույն հաղթանակն է երրորդ հանրապետության պատմության մեջ։ Ես անկեղծ շատ էի ուզում, որ Կապանի քաղաքապետ ընտրվի Նարեկ Բաբայանն, ով Սյունիքի փոխմարզպետ է, որովհետև գիտեմ, համոզված եմ պարոն Բաբայանը շատ տաղանդավոր, ազնվագույն մարդ է, և Հայաստանի քաղաքական կյանքում մենք նրա մասին դեռ կլսենք»,–ասաց նա։
Փաշինյանի խոսքով՝ Կապանում քաղաքացիներն են որոշել՝ ում ընտրեն։
«Իշխանությունը որևէ քայլ չի ձեռնարկել քաղաքացիների ընտրությունը որևէ կերպ իր ցանկությունների տրամաբանության մեջ դնելու համար։ Մենք դրա համար ենք հեղափոխություն արել և հեղափոխությունը հաղթել է»,–նշեց նա։
Հիշեցնենք, որ երեկ՝ հոկտեմբերի 21–ին կայացած ՏԻՄ ընտրությունների արդյունքներով՝ Կապանի քաղաքապետ է ընտրվել անկուսակցական Գեւորգ Փարսյանը՝ ստանալով 10 507 ձայն (54 տոկոս)։ ՔՊ-ական Նարեկ Բաբայանն, ում աջակցում էր Նիկոլ Փաշինյանը, ստացել է 8 499 ձայն։