ԱՄՆ նախագահ Դոնալդ Թրամփը համոզված է, որ սաուդցի լրագրող Ջամալ Խաշոգջիի մահը դավադրության հետեւանք էր, սակայն իրադարձություններն այնպես չեն զարգացել, ինչպես նախօրոք էր ծրագրվել: Նա այս մասին ասել է USA Today-ի հետ հարցազրույցում:
Թրամփի խոսքով՝ սա «դավադրություն էր, որը սխալ ուղղությամբ է տարել»: ԱՄՆ նախագահը նշել է, որ իրավիճակը քննարկել է Սաուդյան Արաբիայի գահաժառանգ արքայազն Մուհամմեդ բեն Սալման Ալ Սաուդի հետ: «Նա ասել է, որ դրան մասնակից չէ ո՛չ ինքը, ո՛չ թագավորը»,- ընդգծել է Թրամփը՝ հրաժարվելով, սակայն, պատասխանել՝ հավատո՞ւմ է արդյոք այդ բացատրությանը:
Ավելի վաղ ԱՄՆ նախագահը լրագրողներին ասել էր, որ Սաուդյան Արաբիայում եւ Թուրքիայում են գտնվում ամերիկյան հատուկ ծառայությունների ներկայացուցիչները, որոնք առաջիկայում կհայտնեն տեղի ունեցածի վերաբերյալ իրենց վարկածը:
Խաշոգջին, որը քննադատում էր Էր Ռիադի քաղաքականությունը հոկտեմբերի 2-ին անհետացել էր Ստամբուլում Սաուդյան Արաբիայի հյուպատոսարան այցելելուց հետո, որտեղ պետք է փաստաթղթեր ստանար Թուրքիայի քաղաքացու հետ ամուսնությունը գրանցելու համար: Մի քանի օր հետո Թուրքիայի ոստիկանությունը սկսել էր նրա անհետացման գործի քննությունը:
Սաուդյան Արաբիայի իշխանությունները հոկտեմբերի 20-ին հայտնել էին, որ Խաշոգջին մահացել է հյուպատոսարանում ծագած վեճի հետեւանքով: Սաուդյան Արաբիայի գլխավոր դատախազ շեյխ Սաուդ ալ Մաուջիբը հայտարարել էր, որ կալանավորված են երկրի 18 հպատակներ, որոնց ինքնությունը չի հրապարակվում: Նա հայտնել էր նաեւ գահաժառանգ արքայազնի խորհրդական, գեներալ Ահմեդ Ասիրիին ազատելու մասին, որը բարձր պաշտոն էր զբաղեցնոևւմ թագավորության հետախուզությունում, ազատվել է նաեւ թագավորական գրասենյակի խորհրդական Սաուդ ալ Քահթանին:
