Ընտրական օրենսգրքի բարեփոխումը Հայաստանում ժողովրդավարության ամրապնդման ուղի է: Այս մասին ճեպազրույցում հայտարարեց Հայաստանում Եվրամիության պատվիրակության ղեկավար Պյոտր Սվիտալսկին՝ նախքան Հայաստանի կառավարության եւ դոնորների միջեւ առաջիկա ընտրությունների տեխնիկական ապահովման համար ֆինանսավորման տրամադրման մասին փաստաթուղթը ստորագրելը:
Դեսպանը ափսոսանք հայտնեց, որ ԸՕ-ի բարեփոխումները չեն ընդունվել խորհրդարանի կողմից: «Մենք հավատում ենք եւ վստահ ենք, որ քաղաքական կամք կա ընտրություններից հետո ԸՕ-ն բարեփոխելու եւ փոփոխություններ մտցնելու, որոնք հստակ առաջարկվել էին միջազգային հանրության կողմից: Ինչպես հասկանում ենք քննարկումներից, ընտրություններից հետո ԸՕ-ն բարեփոխելու կամք կա: Սա Հայաստանում ժողովրդավարության ամրապնդման ուղի է», - ասաց դեսպանը:
Նրա խոսքով, հայ ժողովուրդը պետք է վստահ լինի ընտրությունների արդյունքներում:
«Բայց մենք վստահ ենք, որ Հայաստանում մթնոլորտը բոլորովին այլ է: Կա ուժեղ քաղաքական կամք, եւ սա լավատեսություն է ներշնչում: Երբ կա քաղաքական կամք, դա վճռական նշանակություն ունի: Քանի որ նույնիսկ լավագույն ԸՕ-ն եւ տեխնիկական միջոցները, առանց կամքի, արդյունք չեն տա: Բայց կամքը կա, եւ կա ժողովրդի կամքը: Ժողովուրդը այս տարվա ապրիլից հետո հասկանում է երկրի ընտրությունների նշանակությունը», - ասաց դեսպանը:
Իր հերթին, առաջին փոխվարչապետ Արարատ Միրզոյանը հավաստիացրեց, որ եթե իր քաղաքական ուժը մեծամասնություն կազմի, ԸՕ-ն կբարեփոխվի, եւ հաջորդ ընտրությունները տեղի կունենան բարեփոխված ԸՕ-ով: