«Օրինաց երկիր» կուսակցությունը հույս ունի հաղթահարել անհրաժեշտ նվազագույն շեմը եւ խորհրդարան անցնել: Նոյեմբերի 21-ին մամուլի ասուլիսի ժամանակ կուսակցության փոխնախագահ Մհեր Շահգելդյանը նշեց, որ ՕԵԿ առաջնորդը բարձր վարկանիշ ու քաղաքական մեծ փորձ ունի:
Նրա խոսքով՝ կուսակցության օգտին իրենց ձայները կտան նրանք, ովքեր ՕԵԿ-ի մեջ շոշափելի փոփոխություններ կատարելու հնարավորություն են տեսնում: «Մեր օգտին կքվեարկի հիմնականում միջին խավը, բոլոր նրանք, ովքեր երկրում կայունություն են ցանկանում»,- տեղեկացրեց Շահգելդյանը: Նա չհապաղեց նշել, որ «Օրինաց երկիրը» թավշյա հեղափոխության կողմնակիցն է: Լրագրողների հիշեցնելու փորձերին, որ ՕԵԿ-ը նախորդ իշխող Հանրապետական կուսակցության հետ կոալիցիայի մաս է կազմել, Շահգելդյանը պատասխանեց, որ «դա, հնարավոր է, սխալ է եղել», եւ ՕԵ-ն կոալիցիայից դուրս է եկել 5-6 տարի առաջ: «ՕԵ-ն Հայաստանի ակտիվ քաղաքական ուժերից մեկն է»,- հավելեց նա:
Նրա կարծիքով՝ հեղափոխությունից հետո անհրաժեշտ է ներկայացնել Հայաստանի ռազմավարական զարգացման ծրագիր: «Մենք առաջարկներ ունենք արտաքին քաղաքականության կուրսի վերաբերյալ»,- հայտնեց նա:
Այսպես՝ ՀԱՊԿ առնչությամբ քաղաքական գործիչը համոզմունք հայտնեց, որ այս կառույցը Հայաստանի անվտանգության հարցում կարեւոր դեր է խաղում, հատկապես հաշվի առնելով այն, որ դրա շնորհիվ երկիրը կարող է հատուկ գներով զենք գնել: