Հարավկորեացի պաստորին իրեն հետեւող կանանց բռնաբարելու համար 15 տարով ազատազրկել են՝ տեղեկացնում է BBC News-ը։
75-ամյա Լի Ջե Ռոքը Սեուլի Մանմին կենտրոնական եկեղեցում բռնություններ է կիրառել ծխական 8 կանանց հանդեպ։ Կանայք պատմել են, որ զգացել են պաստորի «աստվածային ուժը» եւ արել են այն, ինչ նա ասել է, որովհետեւ համարել են, որ նա աստված է։
Տղամարդուն ձերբակալել են մայիսին՝ այն բանից հետո, երբ 3 զոհերը հայտարարել էին, որ Լին իրենց հրավիրել է իր տուն եւ ստիպել է իր հետ սեքսով զբաղվել։ «Ես չկարողացա նրան մերժել, նա ավելի մեծ էր, քան թագավորը, նա Աստվածն էր»,- պատմել է կանանցից մեկը՝ հավելելով, որ ինքը դեռ մանկությունից է հաճախում Լիի եկեղեցի։
Դատարանը որոշել է, որ Լին բազմիցս բռնաբարել է 8 կանանց։ Լին այդ ամենը հերքում է՝ ասելով, որ կանոնները խախտելու համար եկեղեցուց հեռացվելուց հետո կանայք վրեժ են լուծում իրենից։
Լին Մանմին եկեղեցին բացել է 1982թ․։ Այդ ժամանակ նա ընդամենը 12 ծխական ուներ։ Այժմ 120 հետեւորդ ունի։ Նրա մասնաճյուղերը գործում են ոչ միայն Հարավային Կորեայում, այլեւ ԱՄՆ-ում, Ռուսաստանում, Գերմանիայում, Կանադայում, Ճապոնիայում։