«Քուրդիստան» կոմիտեն մարտի 8-ին Ստեփան Շահումյանի անվան հրապարակում տեղի ունենլաիք հանրահավաքում խոսելու է աշխարհում, մասնավորապես Թուրքիայում ապրող քուրդ կանանց իրավունքների ոտնահարման մասին: Այս մասին NEWS.am-ի թղթակցի հետ զրույցում ասաց «Քուրդիստան» կոմիտեի ղեկավար Ժենյա Ամիրյանը:
«Մենք բողոքի ձայն ենք բարձրացնելու «Քուրդիստանում» Թուրքիայի իշխանությունների վարած քաղաքականության վերաբերյալ, որը ճնշում է քուրդ կանանց, ոտնահարում նրանց իրավունքներն ու անհիմն ձերբակալում: Մենք կոչ ենք անելու աշխարհի բոլոր կանանց դատապարտել բռնությունները, որոնք կիրառվում են նրանց նկատմամբ, ովքեր բարձրաձայնում են կառավարման արդյունավետության մասին, եւ հայտ են ներկայացնում մասնակցել քաղաքական որոշումների կայացմանը»,- նշեց Ամիրյանը: Նա նկատեց, որ Թուրքիայի խորհրդարանին պատիվ չի բերում քուրդ կին պատգամավորներին ճնշելը, իսկ նրանց ծեծելու տեսարանները հեռարձակվումեն աշխարհով մեկ:
«Եւ այդ ամենին գերտերությունները ոչ մի կերպ չեն արձագանքում եւ իրենց լռությամբ հովանավորում են Թուրքիային քուրդ ժողովրդին ճնշելու հարցում»,-նկատեց Ամիրյանը: Նրա խոսքով` հանրահավաքի անցկացման համար Կոմիտեն հատուկ է ընտրել հենց մարտի 8-ը` կանաց միջազգային օրը, որը, նրա ձեւակերպմամբ, աշխարհի շատ առաջադեմ երկրների կանանց համար մեծարման օր է, մինչդեռ քուրդ կանանց համար ոչ մի կերպ չի առանձնանում:
Հարցին, թե ի՞նչ վիճակում է Հայաստանում ապրող քուրդ կանանց իրավունքների պաշտպանությունը, «Քուրդիստան» կոմիտեի նախագահը արձագանքեց, թե Հայաստանում կայանք ավելի պաշտպանված են: «Իրավունքների ոտնահարման դեպքեր իհարկե կան, սակայն ոչ այն աստիճանի, ինչպես դա տեղի է ունենում Թուրքիայում: Իսկ նման դեպքերը կանխելու համար յուրաքանչյուր կին պետք է պահանջի հարգել իրեն»,-նկատեց Ամիրյանը:
Նշենք, որ Երեւանի քաղաքապետի լիազոր ներկայացուցիչը ի գիտություն է ընդունել «Քուրդիստան» կոմիտեի իրազեկումը` 2011թ. մարտի 8-ին ժամը 12-ից Ստ. Շահումյանի անվան հրապարակում հանրահավաք անցկացնելու վերաբերյալ: