Չինական Huawei ընկերության ֆինանսական տնօրեն Մեն Վանչժոուն, ով ամերիկյան դատախազության խնդրանքով կալանավորվել էր Վանկուվերի օդանավակայանում, վերջին տարիներին տարբեր անուններով Հոնկոնգի միանգամից երեք անձնագիր է օգտագործել, հաղորդում է ՏԱՍՍ-ը՝ վկայակոչելով Standard թերթին:
Հրապարակման համաձայն վերջին 11 տարիներին Մեն Վանչժոուն, որը հայտնի է նաեւ որպես Սաբրինա Մեն, ընդհանուր առմամբ 7 անձնագիր է ունեցել՝ 3 Հոնկոնգի եւ 4 Չինաստանի: 2014-ից մինչեւ 2017 թվականը նա Հոնկոնգի անձնագրերով 33 ուղեւորություն է կատարել ԱՄՆ-ի եւ Կանադայի այնպիսի քաղաքներ, ինչպիսիք են ՝ Նյու Յորքը, Բոստոնը, Լոս Անջելեսը, Սիեթլը եւ Վանկուվերը:
Թերթի աղբյուրները նշում են, որ Huawei-ի գլխավոր մենեջերը, կարողացել է միանգամից մի քանի անձնագիր ստանալ, քանի որ մի քանի անգամ փոխել է անունը: Միեւնույն ժամանակ նորը ստանալուց առաջ նա նախորդ անձնագիրը չի հանձնել, թեեւ օրենքով պետք է այդպես աներ:
Չինաստանիի այդ հատուկ վարչական շրջանի արտագաղթի վարչությունը հայտարարություն է տարածել՝ նշելով, որ անթույլատրելի է այդ ինքնիշխան տարածքի ավելի քան մեկ անձնագիր ունենալ:
Կանադայի իրավապահների կողմից Վանկուվերի օդանավակայնում Huawei ընկերության ֆինանսական տնօրենը դեկտեմբերի 1-ին կալանավորվել էր: Կալանավորումը կատարվել էր Նյու Յորքի Արեւելյան շրջանի դատախազության խնդրանքով՝ Իրանի դեմ ԱՄՆ-ի պատժամիջոցների խախտման մեղադրանքի կապակցությամբ: Դելտեմբերի 8-ին Կանադայի Բրիտանական Կոլումբիա նահանգի Գերագույն դատարանը որոշել էր, որ դեկտեմբերի 10-ին կշարունակի Մեն Վանչժոուի ձերբակալման գործի վերաբերյալ լսումները: