Ուրբաթ՝ դեկտեմբերի 14-ին, Իռլանդիայում, որտեղ գտնվում է Facebook-ի եվրոպական գրասենյակը, տվյալների պաշտպանության հանձնաժողովը (DPC) հետաքննություն է սկսել ընկերության նկատմամբ սոցիալական ցանցի նոր խոցելիության հայտնաբերումից հետո, հաղորդում է «Немецкая волна»-ն:
DPC փորձագետները մտաադիր են ուսումնասիրել, թե ինչպես է Facebook-ը կատարել 2018 թվականի մայիսի վերջում ուժի մեջ մտած Եվրամիության Տվյալների ընդհանուր պաշտպանության նորմերը:
Նույն օրն ավելի վաղ Facebook-ի ներկայացուցիչները հաղորդել են հայտնաբերված խոցելիության մասին, որի պատճառով սոցիալական ցանցի 6.8 մլն օգտատերերի լուսանկարները կարող էին հասանելի դառնալ կողմնակի հավելվածների համար: Facebook-ի հայտարարության մեջ նշվում էր, որ խոցելիությունը սեպտեմբերի 13-ից 25-ն ընկած ժամանակահատվածում էր:
ԵՄ-ի կողմից տվյալների պաշտպանության կանոնները խստացնելուց հետո DPC-ը սոցիալական ցանցի օգտատերերից բազմիցս ստացել է բողոքներ իրենց անձնական տարածության խախտումների վերաբերյալ, նշել է հանձնաժողովի ներկայացուցիչ Գրեմ Դոյլը: Տվյալների պաշտպանության մասին եվրոպական օրենսդրությունը խախտելու համար Facebook-ին և այլ միջազգային կազմակերպություններին սպառնում է տուգանք տարեկան շրջանառության մինչև 4 տոկոսի չափով:
