ԵԱՀԿ Մինսկի խմբի հայտարարությունը իր բնույթով առաջինը չէ, նախկինում էլ եղել են նմանատիպ հայտարարություններ: Այս մասին NEWS.am-ի հետ զրույցում նշեց «Մարդկային զարգացման միջազգային կենտրոնի» ղեկավար Թեւան Պողոսյանը՝ անդրադառնալով ԵԱՀԿ Մինսկի խմբի համանախագահների վերջին հայտարարությանը:
Նա հիշեցրեց, որ բանակցային գործընթացում բազմաթիվ հանդիպումներ են եղել, այդ թվում Սոչիում, Մանդորֆում, որտեղ խոսվել է երկու երկրների քաղհասարակությունների համագործակցության մասին, սակայն ավելի ուշ դրանք մոռացվել են:
«Այդ տեսակի տեքստեր կարող են շատ լինել: Հասկանալի է, որ խոսում են անվտանգության խնդիրների, էսկալացիայի նվազման մասին, փորձում են ինչ-որ ձեւով այսօրվա իրավիճակ հանդարտ պահեն: Միգուցե դա կնպաստի ապագայում ինչ-որ բանակցային գործընթացներ սկսել: Բայց դա ավելի շատ կախված է նրանից, թե կողմերն այդ ընթացքում ինչ կանեն»,-նշեց Թեւան Պողոսյանը:
Նա նկատեց, որ այս ընթացքում Մինսկի խմբի համանախագահող երկիր Ռուսաստանի ԱԳ նախարար Սերգեյ Լավրովը հայտարարում է, որ Ադրբեջանն ինչ-որ առաջարկներ է արել, որոնք ողջունելի կլինեն, բայց որեւէ մեկն այդ առաջարկները չի տեսել ու չի լսել. «Սա նշանակում է, որ խոսքը խնդրի լուծման մասին չէ: Խնդրի շուրջը որոշ փոքր հարցերի մասին գուցե խոսում են, քննարկում են, միգուցե փորձում են մոտեցումներ ձեւավորել, բայց լուծման մասին դեռ չկա ոչինչ»:
Ի՞նչ է քննարկվել Մնացականյանի ու Մամեդյարովի հետ. ԵԱՀԿ Մինսկի խմբի հայտարարությունը