Մենք պետք է մտածենք, թե ինչպես ենք օգտագործելու միջազգային եղած օրենքներն ու գործիքակազմը, Հայաստանի շահերն առաջ տանելու համար: Այս մասին NEWS.am-ի հետ զրույցում նշեց «Մարդկային զարգացման միջազգային կենտրոնի» ղեկավար Թեւան Պողոսյանը՝ անդրադառնալով դիտարկմանը, որ ըստ որոշ փորձագետների, Հայաստանը պետք է քայլեր անի ուղղված մադրիդյան սկզբունքներից աստիճանաբար հրաժարմանը:
«Կարո՞ղ ենք այնպես անել, որ բանակցություններում օգտագործվի միայն ազգերի ինքնորոշման սկզբունքը: Եթե ոչ, միգուցե պետք է այլ գործիքակազմ ձեւավորվի, նոր առաջարկներ պետք է արվեն, նոր իրավիճակներ ձեւավորվեն»,-ասաց նա:
Թեւան Պողոսյանը նկատեց, որ բանակցային գործընթացում հետաքրքիր մի միտում կա. «Ցանկացած փաստաթուղթ, որն ինչ-որ չափով գաղտնազերծվել է, այլեւս համարվել է մեռած: Դա վերաբերում է նաեւ նրան, ինչ հասկանում ենք «մադրիդյան սկզբունքներ» ասելով: Դրանք մադրիդյան սկզբունքներ չեն, դրանք տարբեր սկզբունքներ են տարբեր տեղերից վերցրած: Ցանկացած ֆորմուլա, որի մասին բարձրաձայնվել է, հաջորդ օրը համարվել է մեռած:
Իրականում մարդիկ պետք է գիտակցեն, որ խնդիրն այդքան պարզունակ չի լուծվելու եւ եթե ազգը կանգնում է իր արժեքների համար, որեւէ խնդիր չի լուծվելու միջազգային օրենքով, այլ ազգի ուժով է լուծվելու»:
