Արցախն անկախ հայտարարելու մոտեցում սխալ էր, որի ընթացքը տեղի ունեցավ 1990-ականների սկզբին, մեր համոզմամբ այդ գաղափարը հայկական ծագում չուներ: Այս մասին այսօր՝ հունվարի 19-ին, Արցախում հանդիպման ժամանակ հայտարարեց «Սասնա Ծռեր» կուսակցության անդամ Ժիրայր Սեֆիլյանը:
Նրա խոսքով, Արցախյան շարժումն սկսել է միացման գաղափարով, ոչ թե Արցախը Հայաստանից անկախացնելու:
«Մենք համոզված ենք, որ այդ ծրագիրը ներմուծված է եղել Կրեմլից: Ռուսական քաղաքականությունն Ադրկովկասում եղել է «բաժանիր, որ տիրես»-ը: Մենք պետք է հրաժարվենք այդ գաղափարից, հակառակ դեպքում դա տանում է մեզ թուլացման: Նաեւ հաշվի առնելով տարածաշրջանային ռազմաքաղաքական անցուդարձերը, որ սպասվում են, վտանգը մեծ է, որ մենք հերթական անգամ կարող ենք օգտագործվել Ռուսաստանի կողմից»,-ասաց Սեֆիլյանը:
«Կարծիք կա եւ հատուկ շրջանառության մեջ են դրել, որ եթե միացում լինի, դա պատերազմի հրահրում է նշանակում, Ադրբեջանը կհարձակվի: Մեր համոզմամբ հակառակն է, ինչքան ուշացնենք, այնքան թուլանալու ենք: Երբ միացումը դե յուրե տեղի ունենա, պատերազմի հավանականությունը ավելի քչանալու է, իսկ պատերազմի միշտ պետք է պատրաստվել:
Հասկանում ենք, որ այս գաղափարով հակադրվում ենք աշխարհաքաղաքական տարբեր շրջանակների հետ, բայց միաժամանակ գիտակցում ենք, որ սրանով հնարավորություն է բացվում այդ շրջանակների հետ շահեր կիսելու, գործակցելու»,-ընդգծեց Սեֆիլյանը: