Ռուս-հայկական հարաբերություններում խնդիրներ կան: Հունվարի 22-ին Երեւան-Մոսկվա տեսակամուրջի ժամանակ այս մասին ասաց պատմագիտության դոկտոր, ՌԳԱ Հմաշխարհային տնտեսության եւ միջազգային հարաբերությունների ինստիտուտի առաջատար գիտաշխատող Ալեքսանդր Կռիլովը:
Նրա խոսքով՝ սա պայմանավորված է այն հանգամանքով, որ Հայաստանում քաղաքական փոփոխությունները որոշակի շրջանակներ ընկալում են որպես «գունավոր հեղափոխություն»: «Չնայած 2018 թվականի ապրիլ-մայիսին տեղի ունեցած քաղաքական փոփոխությունների խաղաղ բնույթին, միեւնույն է՝ ռուս հասարակության շրջանում մտավախություններ կան, որ արդյունքում կպարզվի՝ «թավշյա» հեղափոխությունը «գունավոր» էր»,- պարզաբանեց նա:
Փորձագետը նշեց, որ եթե իշխանության եկած մարդիկ նախկինում հակառուսական տրամադրություններ ունեին, ապա հիմա հասկանալով Հայաստանի ազգային շահերի համակարգում հայ-ռուսական հարաբերությունների կարեւորությունը, վարում են Մոսկվայի հետ հարաբերությունների կառուցման գործունեություն:
Ալեքսանդր Կռիլովը, միաժամանակ, ընդգծեց, որ եթե ներկայիս իշխանությունները շարունակեն նույն քաղաքականությունը վարել, որը վարում են գործնականում բոլոր հետխորհրդային երկրների վերնախավերի ներկայացուցիչները, ապա նրանց եւս տապալում է սպասում: «Եթե տեսանելի ապագայում բնակչության սոցիալ-տնտեսական կյանքում զգալի փոփոխություններ չլինեն, ապա դա կարող է հանգեցնել նոր հուզումների եւ փոփոխությունների»,- եզրափակեց փորձագետը: