Աբու Դաբիում ավարտվեց Հռոմի պապ Ֆրանցիսկոսի հրապարակային պատարագը՝ դառնալով վերջին միջոցառումը ԱՄԷ հովվապետի պատմական եռօրյա այցի ընթացքում, տեղեկացնում է ՌԻԱ «Նովոստի»-ն։

Աբու Դաբիի Zayed Sports City Stadium մարզադաշտում եւ նրա շրջակայքում պատարագին հետեւել է ավելի քան 130 հազար մարդ։ Պատարագի ուղիղ հեռարձակումը տրվել է տեղական հեռուստաալիքներով, ինչպես նաեւ ԱՄԷ կաթոլիկ եկեղեցիներում։

Սպիտակ խորանի առջեւ (որի վրա պատկերված էին խաչն ու Կույս Մարիամի ֆիգուրը) պատարագող Ֆրանցիսկոս պապի խոսքերը քանիցս ընդմիջվել են ծափահարություններով։ Պատարագի ընթացքում հնչել են տեքստեր տասը տարբեր լեզուներով, ներառյալ իտալերենը, անգլերենը, արաբերենը, լատիներենը, ֆրանսերենը, կորեերենը եւ հնդկական ենթամայրցամաքի լեզուները։

Հռոմի կաթոլիկ եկեղեցու առաջնորդ Ֆրանցիսկոս պապի այցը ԱՄԷ առաջինն էր Արաբական թերակղզում։ Ավելի վաղ Հռոմի պապը համատեղ խարտիա էր ստորագրել հեղինակավոր Ալ Ազհար իսլամական համալսարանի ղեկավար շեյխ Ահմադ աթ-Թեյիբի հետ, մասնկացել միջկրոնական երկխոսությանը եւ հանդիպումներ ունեցել ԱՄԷ ղեկավարության հետ։