Իրանում ձերբակալել են ընդդիմության առաջնորդներ, նախագահի նախկին թեկնածուներ Միրհոսեյն Մուսավիին եւ Մեհդի Քարուբիին: Այդ մասին փետրվարի 28-ին հաղորդում է Reuters գործակալությունը` վկայակոչելով Kaleme ընդդիմադիր կայքը:
Մանրամասները չեն հաղորդվում, հայտնի է միայն, որ նրանց ուղարկել են Թեհրանի Հեշմատիեհ բանտ:
Ավելի վաղ Reuters-ը հայտնել էր Քարուբիի որդու եւ կնոջ ձերբակալության մասին:
Ներքաղաքական իրավիճակն Իրանում սրվել էր 2009թ. հունիսի 12-ին կայացած նախագահական ընտրություններից հետո, երբ ընդդիմությունը մեղադրել էր իշխանություններին ընտրությունների արդյունքները կեղծելու մեջ: