Ղարաբաղի կարգավիճակի հարցը պետք է հանվի օրակարգից։ Այս մասին փետրվարի 22-ին լրագրողների հետ հանդիպմանն ասել է Հայաստանի Դեմոկրատական կուսակցության նախագահ Արամ Սարգսյանը։
Նրա խոսքով՝ այսօր միանգամայն այլ իրավիճակ է ստեղծվել, եւ արտաքին գործերի նախարարությունը պետք է վերանայի բանակցությունների վարման մոտեցումը։ «Լեռնային Ղարաբաղի Հանրապետությունը կազմավորվել է միջազգային իրավունքի հիման վրա։ Ընդ որում՝ Ադրբեջանը մինչեւ այժմ չի բողոքարկել այդ իրավունքի իրականացման օրինականությունը։ Բաքուն, բանակցություններ վարելով երրորդ կողմի՝ Հայաստանի հետ, ըստ էության, Ղարաբաղի տարածքը առնվազն վիճելի է համարում։ Կարգավիճակի հարցի քննարկումը իրավաբանական իմաստ չունի»,- նշել է նա։
Սարգսյանը ընդգծել է, որ եթե կան վիճելի տարածքներ, ապա դրանց հարցը պետք է լուծել կամ մարտադաշտում, ինչն Ադրբեջանին չհաջողվեց անել, կամ միջազգային դատարաններում։