ՆԱՏՕ-ն նկատի է առել Հայաստանի որոշումը՝ Սիրիայում մարդասիրական առաքելություն իրականացնելու մասին։ Այս մասին ասել է ՆԱՏՕ գլխավոր քարտուղարի Հարավային Կովկասի գծով հատուկ ներկայացուցիչ Ջեյմս Ապատուրայը Երեւանում ընթացող կոնֆերանսում։
Կոնֆերանսը տեղի է ունենում Հայաստանի Ֆրանսիական համալսարանում, այն կազմակերպվել է Հայաստանում Ֆրանսիայի դեսպանության աջակցությամբ։
Ջեյմս Ապատուրայը հիշեցրել է, որ ՆԱՏՕ-ն չի մասնակցում Սիրիայում գործողություններին։ «Այնուամենայնիվ, երեկ (Հայաստանի ղեկավարության հետ հանդիպումների ժամանակ) նույնպես քննարկել են այս հարցը։ Ինձ պարզաբանեցին, թե ինչու է դա արվում, ներկայացրին քաղաքական եւ մարդասիրական սկզբունքներ։ Վերադառնալով՝ ես կներկայացնեմ հայկական իշխանությունների տեսակետը եւ կանեմ այնպես, որպեսզի այդ տեսակետը ներկայացվի բոլոր դաշնակիցներին»,- տեղեկացրել է Ջեյմս Ապատուրայը։