Apple-ը Կալիֆոռնիա նահանգի Կուպերտինոյում գտնվող իր գլխավոր գրասենյակում ներկայացրել է նոր iPad Air-ը եւ iPad mini-ն։ Երկու նոր գաջեթները աշխատում են առաջին սերնդի Apple Pencil-ով՝ հայտնում է РБК-ը։
iPad Air պլանշետը, ըստ ծրագրի, կթողարկվի նոր դիզայնով՝ գերբարակ կորպուսով, 10,5 դյույմանոց դիսփլեյով եւ Apple A12 Bionic չիպով։ Վերջինը, ինչպես նշել են ընկերությունում, ապահովում է գաջեթի արտադրողականության բարձրացումը 70 տոկոսով եւ երկու անգամ մեծացնում է դրա գրաֆիկական հնարավորությունները։ Ինչպես նաեւ True Tone տեխնոլոգիայով Retina դիսփլեյը, որով հագեցած է նոր iPad Air-ը, կմեծացվի 20 տոկոսով՝ հայտնել են Apple-ում։
iPad mini-ն կպահպանի 7,9 դյույմանոց էկրանը, սակայն կհագեցվի նույն A12 համակարգով, իչպես նաեւ նույն True Tone տեխնոլոգիայով Retina դիսփլեյով, ինչպես iPad Air-ը։
Արտադրողն iPad Air-ը կառաջարկի երկու տարբերակով՝ 64 Գբ եւ 256 Գբ ծավալներով հիշողությամբ։ Նման մոդելներ կունենա նաեւ iPad mini-ն։ Պլանշետները հասանելի կլինեն ոսկեգույն, արծաթագույն եւ «տիեզերական մոխրագույն» տարբերակներով։
64 Գբ հիշողությամբ iPad mini-ն կարժենա 399 դոլար, Wi-Fi + Cellular տարբերակը՝ 529 դոլար։ iPad Air-ի գները սկսվում են 499 դոլարից, Wi-Fi + Cellular-ը կարժենա 629 դոլար։
Նոր գաջեթները Ավստրալիայից, Կանադայից, Ֆինլանդիայից, Լյուքսեմբուրգից, Նոր Զելանդիայից, ԱՄԷ-ից, Մեծ Բրիտանիայից, ԱՄՆ-ից եւ ԵՄ-ից գնորդները կարող են արդեն պատվիրել Apple-ի կայքի Apple Store հավելվածում։ Մյուս երկրներին, այդ թվում՝ Ռուսաստանին պատվերի համար դրանք հասանելի կլինեն հաջորդ շաբաթվանից սկսած։