Հիմա աշխատանքային խումբ է ստեղծված, որը մշակում է առանց մեղադրական դատավճռի գույքի բռնագանձման վերաբերյալ փաթեթ, որը պետք է կարգավորի մի հարց, որով միեւնույն է լուծումը տալու է դատարանը: Այս մասին, այսօր՝ մարտի 29-ին, ԱԺ-ում լրագրողների հետ զրույցում նշեց ՀՀ գլխավոր դատախազ Արթուր Դավթյանը:
Նրա խոսքով, այլ գործընթացներ, այլ քրեաիրավական մեխանիզմներ են առաջարկվելու, որով էլի դատախազը մի կողմում, մյուս կողմում կոնկրետ գույքի սեփականատերը, դատարանում ներկայացնելու են իրենց փաստարկները. «Այսինքն դարձյալ դատարանն է որոշելու՝ գույքը ապօրինի՞ է ձեռք բերված, թե՞ օրինական: Որւէ այլ մարմին չէ, որ կզրկի մարդուն իր սեփականությունից: Միեւնույն է իրականացնելու է դատարանը, այսինքն տեղի է ունենալու արդարադատություն»:
Հարցին, թե ով է կասկած հարուցելու որեւէ անձի սեփականության օրինական լինել-չլինելու վերաբերյալ, դատախազը պատասխանեց. «Հենց քննարկումները դրա շուրջ են, թե նման վարույթներն ինչ առիթներով կարող են սկսվել: Հիմա աշխատանքային խումբը հենց այդ մեխանիզմների վրա է աշխատում, թե ինչ աղբյուրներ պետք է վկայակոչվեն, որոնց առկայության պայմաններում դա կարող է առիթ հանդիսանալ ստուգողական վարույթներ իրականացնելու եւ ինչ պայմաններում է, որ դատախազը կգնա դատարան եւ կներկայացնի հմապատասխան հայց: Սա գործիք է, որ գալիս է օգնության քրեական արդարադատությանը»:
Նա նաեւ բերեց օրինակներ. «Այդպիսի իրավիճակներ առաջանում են այն դեպքում, երբ օրինակ քրեական հետապնդման ենթակա անձը մահացել է կամ անցել է նրա նկատմամբ քրեական պատասխանատվության վաղեմության ժամկետներ, հետեւաբար չենք կարող ունենալ մեղադրական դատավճիռ: Սրանք իրավիճակներ են, երբ ակնհայտ է, որ մարդը հափշտակել է պետությանը պատկանող գույք, բայց իրավական կարգավորումների պատճառով նրա նկատմամբ մեղադրական դատավճռի չենք կարող հասնել»:
Արթուր Դավթյանը չցանկացավ անուններ նշել, թե կոնկրետ որ դեպքերն են իրենց ստիպել գնալ նման կարգավորումների:
