2018թ. Թուրքիայի կողմից իրականացված «Ձիթենու ճյուղ» ռազմական գործողության արդյունքում Սիրիայի քրդաբնակ Աֆրին շրջանը անցել էր Թուրքիայի վերահսկողության տակ:
Աֆրինում բնակվող վերջին հայը` Հարութ Գեւորգը, թուրքական բանակի ստորաբաժանումների եւ «Սիրիայի ազատ բանակ» խմբավորման կողմից իր տան գույքի բռնագրավման, թալանի եւ անմարդկային հարձակումների պատճառով ստիպված է եղել լքել բնակավայրը, հաղորդում է ermenihaber.am-ը:
Հարութ Գեւորգի ընտանիքը հարյուր հազարավոր այն հայ ընտանիքներից մեկն է, որ ստիպված էր արտագաղթել 1915թ. Հայոց ցեղասպանության հետեւանքով:
Նշվում է, որ Գեւորգը մանկուց ապրել է Աֆրինում եւ գոյությունը պահպանել է մետաղագործական իրերի խանութ աշխատեցնելով: Սակայն թուրքական ԶՈւ-ի ու արաբական «Սիրիայի ազատ բանակ» զինված խմբավորման ավազակաբարո գործողությունների արդյունքում ողջ ունեցվածքը կորցնելուց հետո ստիպված տեղափոխվել է Հալեպ:
Ըստ աղբյուրի` Գեւորգի Ջինդիրեսի ճանապարհին գտնվող տունը այժմ մզկիթի են վերածել եւ տվել Ալ- Ֆարուք անվանումը:
Հիշեցնենք, որ պաշտոնական Անկարայի աջակցությունը վայելող «Սիրիայի ազատ բանակ» խմբավորումը 2018թ. հունվարի 20-ին Թուրքիայի օդուժի աջակցությամբ ներխուժել էին Սիրիայի քրդերի վերահսկողության տակ գտնվող սիրիական Աֆրին շրջան։ «Ձիթենու ճյուղ» անվանումով ռազմական գործողության նպատակն էր Սիրիայի քրդերից վերցնել Թուրքիայի հետ սահմանին ընկած 30կմ խորությամբ հատվածը եւ այնտեղ հիմնել անվտանգության գոտի:
