Զինվորական ծառայության ժամանակ զոհված Ռուբեն Ալեքսանյանի մայրը դժգոհում է ներկա իշխանությունների անտարբերությունից։ Այս մասին նա ասաց այսօր՝ ապրիլի 2-ին, «Եռաբլուր» պանթեոնում նա լրագրողների հետ զրույցում:
Տիկնոջ խոսքով 4 տղաներն էլ ծառայել են։ Մեծ տղան մեդալներով է տուն վերադարձել, սակայն ՌԴ արտագնա աշխատանքի ժամանակ մահացել է։ Մյուս որդին՝ Ռուբենը, 2015թ.–ի դեկտեմբերի 18–ին միայնակ պայքարել է հակառակորդի դիվերսիոն խմբի դեմ եւ զոհվել։
2013թ.–ին Տաշիր քաղաքում մասնակի վճարումով տուն են գնել, սակայն մեծ որդու մահանալուց եւ մյուս զինծառայող որդու զոհվելուց հետո հայտնվել են ֆինանսական ծանր վիճակում եւ չեն կարողանում մարել տան գումարը։
Կինը նամակով դիմել է ՀՀ վարչապետին, Պաշտպանության նախարարությանը, բայց ոչ մի արձագանք չի ստացել:
Այսօր՝ ապրիլի 2–ին, կինը եկել էր Եռաբլուր, որպեսզի որդու մեդալները հետ վերադարձնի։
«Բերել եմ, որ վարչապետին, Պաշտպանության նախարարին, ով ուզում է լինի, մի կառավարության անդամ, որ կարողանա ինքը հպարտությամբ հետ վերցնել։ Ես ընկճված ու հուսահատ հետ եմ վերադարձնում։ Եթե ես այսօր, այս պետության մեջ այդ հպարտության զգացումը չզգամ, իմ զոհված որդին կզգա՞»,–ասաց զոհված զինծառայողի մայրը։