ԳԴՀ իշխանությունները վճռականորեն մերժել են երկու համաշխարհային պատերազմների ընթացքում երկրին Գերմանիայի կողմից հասցված վնասների փոխհատուցումների մասին Հունաստանի նոր պահանջները։ «Դաշնային կառավարության դիրքորոշումն անփոփոխ է՝ գերմանական փոխհատուցումների հարցը վերջնականապես կարգավորված է ինչպես իրավական, այնպես էլ քաղաքական առումով»,- հայտարարել է գերմանական կառավարության պաշտոնական ներկայացուցիչ Շտեֆեն Զայբերտը՝ հայտնում է DW-ը։
Բեռլինում նշում են Գերմանիայի միասնականության վերականգնման մասին 1990թ․ կնքված «երկու գումարած չորս» պայմանագիրը, որը փոխհատուցումներ չի նախատեսում եւ ճանաչվել է նաեւ Հունաստանի կողմից։
Գերմանիան հետպատերազմական տարիներին 115 միլիոն գերմանական մարկ ընդհանուր գումարով փոխհատուցումներ է վճարել ազգային-սոցիալիստական ռեժիմի զոհերին։ Դրանք 1960թ․ պայմանագրով փակել են բոլոր անհատական պահանջները։
Բացի այդ, պատերազմական տուգանքների հարցով առաջին համաժողովում, որը կայացել է 1945թ․ աշնանը՝ Փարիզում, Երկրորդ համաշխարհային պատերազմի համար բոլոր տուգանքներից Հունաստանին տրամադրվել է իր մասնաբաժինը։ Այդ որոշման համաձայն, Հունաստանը հետպատերազմյան Արեւմտյան Գերմանիայից ստացել է, այսօրվա կուրսով վերահաշվարկած, 2 միլիարդ եվրոյի ապրանք։
Ինչ վերաբերում է Առաջին համաշխարհային պատերազմի համար փոխհատուցումներին, ապա Գերմանիան ամբողջովին ավարտել է դրա վճարումը 2010 թվականին։
Ապրիլի 17-ին Հունաստանի խորհրդարանը ձայների մեծամասնությամբ հավանության է արժանացրել «բոլոր անհրաժեշտ դիվանագիտական եւ իրավաբանական միջոցներով» փոխհատուցումներ ստանալու հունական պահանջներին հասնելու Ալեքսիս Ցիպրասի կառավարությանը պարտավորեցնելու բանաձեւը։