Մոսկվայում Ուկրաինայի նոր նախագահի մասին դատողություններ կկատարեն ըստ նրա գործերի: Այս մասին լրագրողներին ասել է ՌԴ նախագահի մամուլի քարտուղար Դմիտրի Պեսկովը, փոխանցում է ՏԱՍՍ-ը:
«Հնարավոր է դատողություններ անել միայն ըստ կոնկրետ գործերի»,- նշել է նա:
Պեսկովը վաղաժամ է համարել ՌԴ նախագահ Վլադիմիր Պուտինի կողմից Զելենսկուն շնորհավորելու մասին խոսակցությունները: «Առայժմ վաղաժամ է խոսել պարոն Զելենսկուն նախագահ Պուտինի կողմից շնորհավորելու մասին, ինչպես նաեւ համատեղ աշխատելու հնարավորության մասին»,- նշել է նա:
«Որովհետեւ անհրաժեշտ է դատողություններ անել ըստ կոնկրետ գործերի, ըստ կոնկրետ քայլերի»,- պարզաբանել է նա: «Առավել եւս եկեք ելնենք նրանից, որ առայժմ ընտրությունների պաշտոնական տվյալները չեն հրապարակվել, որոնք պարզապես դեռեւս չեն ամփոփվել»,- հավելել է Կրեմլի ներկայացուցիչը: Պատասխանելով հարցին՝ կարելի՞ է արդյոք ասել, որ Ռուսաստանի նախագահը որոշել է Զելենսկուն չշնորհավորել մինչեւ Ուկրաինայի ԿԸՀ վերջնական տվյալների հրապարակումը, Պեսկովն ասել է. «Ոչինչ չունեմ ավելացնելու այն ամենին, ինչ հիմա ձեզ ասացի, եւ պարզաբանելու ոչինչ չկա»:
Խոսելով քվեարկության արդյունքների հանդեպ վերաբերմունքի մասին՝ նա շեշտել է, որ Ռուսաստանը հարգում է Ուկրաինայի քաղաքացիների կատարած ընտրությունը, չնայած այդ գործընթացի լեգիտիմությունն արդեն հարցեր է առաջացրել, երբ քվեարկելու հնարավորություն չի տրվել ՌԴ-ում բնակվող Ուկրաինայի 3 մլն քաղաքացիներին:
Ուկրաինայի ԿԸՀ կողմից էլեկտրոնային արձանագրությունների 99 տոկոսի մշակման արդյունքների համաձայն՝ «Ժողովրդի ծառա» կուսակցության ներկայացուցիչ Վլադիմիր Զելենսկին զգալիորեն առաջ է անցել իր մրցակցից՝ գործող նախագահ Պյոտր Պորոշենկոյից. ձայների 73,21 տոկոս ընդդեմ 24,46 տոկոսի:
