Ռուսաստանի նախագահ Վլադիմիր Պուտինը Ուկրաինայի նորընտիր նախագահ Վլադիմիր Զելենսկուն խորհուրդ է տվել մարդու իրավունքների պահպանումը սկսել վրացիներից, օրինակ՝ Միխայիլ Սաակաշվիլիից, փոխանցում է ՏԱՍՍ-ը:
«Ինչ վերաբերում է ազատություններին, այդ իմաստով նույնիսկ ավելի լավ է սկսել ոչ թե Ռուսաստանից, ոչ թե ռուսներից, այլ, ասենք, վրացիներից կամ նախկին վրացիներից: Օրինակ՝ արդարացի կլիներ ուկրաինական անձնագիրը վերադարձնել մարդու, որն անցյալում վրացի է եղել, իսկ այսօր իրեն ուկրաինացի է համարում, նկատի ունեմ Միխայիլ Նիկոլաեւիչ Սաակաշվիլիին»,- ասել է Պուտինը լրագրողներին:
Պուտինը հիշեցրել է, որ Սաակաշվիլին «ապօրինի զրկվել է քաղաքացիությունից, երկրից ապօրինի վտարվել է, եւ նրան պետք է վերադարձնել, վերականգնել խախտված իրավունքները՝ այնպես, ինչպես Ուկրաինայի մյուս շատ քաղաքացիների, որոնք ստիպված էին երկրի տարածքը լքել եւ ավետյաց երկրներ գնալ՝ փրկվելով այսօրվա ուկրաինական ռեժիմի հետապնդումներից»:
