Այսուհետ Ucom ընկերության շարժական կապի բաժանորդները կկարողանան օգտագործել իրենց iPhone XS, XS Max եւ XR սմարթֆոնները երկու SIM քարտով միաժամանակ: Այս մասին նշել է Ucom ընկերության համահիմնադիր եւ գլխավոր տնօրեն Հայկ Եսայանը։
Նրա խոսքով, Apple ընկերության պաշտոնական գործընկեր Ucom-ը տարածաշրջանում առաջինն է ներդնում եւ գործարկում eSIM տեխնոլոգիան, որն այս պահի դրությամբ գործում է աշխարհի ընդամենը 29 երկրներում։
«Այս նոր տեխնոլոգիան եկել է փոխարինելու ֆիզիկական SIM քարտերին մասնավորապես նորագույն սերնդի iPhone-ներում, որոնց մեջ ներկառուցված SIM-ը կոչվում է eSIM։ Այսինքն, եթե բաժանորդների սմարթֆոններն ունեն նման հնարավորություն, մնում է միայն ակտիվացնել ծառայությունը եւ eSIM-ն անմիջապես կգործարկվի։ Արդյունքում բաժանորդները կունենան եւս մեկ հեռախոսահամար իրենց սմարթֆոնում»,-ասել է նա:
Եսայանի ներկայացմամբ, սա կարեւոր նորամուծություն է մասնավորապես iPhone օգտագործողների համար, քանի որ նրանցից շատերը մշտապես զգում են երկրորդ SIM քարտի անհրաժեշտությունը. «Այս պահին մեր ընկերությունը բանակցում է նաեւ Apple Watch 3 կամ 4-ի եւ մի շարք այլ արտադրողների կողմից արտադրվող սմարթֆոնների օգտատերերին նույն հնարավորությունն ընձեռելու ուղղությամբ»:
Նշենք, որ eSIM-ն ակտիվացնելու համար անհրաժեշտ է նախ բաժանորդագրվել eSIM ծառայությանը եւ ստանալ հատուկ QR կոդ։ Այնուհետեւ պետք է բացել շարժական կապի կարգավորումներն ինտերնետին միացված սմարթֆոնի վրա, սկանավորել QR կոդը, որից հետո՝ ներբեռնել եւ հաստատել բաժանորդագրությունը: Այս պարզ քայլերից հետո բաժանորդները կկարողանան վայելել իրենց iPhone-ներն արդեն երկու հեռախոսահամարով:
Հավելենք, որ eSIM ծառայությանը հնարավոր է բաժանորդագրվել Երեւանի Ամիրյան 4/7, Հյուսիսային պողոտա 1/2; Yerevan Mall, Արշակունյաց 34; Բագրատունյաց 16/115; Րաֆֆու 39/4; Գայի 17/3; Կոմիտասի 30; Կոմիտասի պող. 8; Էրեբունի 20/52; Տիգրան Մեծի 12/58; Մաշտոցի 5ա/50; Վանտյան 61ա; Սայաթ-Նովա 40/1; Գյումրու Սայաթ-Նովա 7; Վանաձորի Տիգրան Մեծ 61, ինչպես նաեւ Արմավիրի Հանրապետության 7 հասցեներում տեղակայված Ucom-ի սպասարկման կենտրոններում։