Մաքսային ծառայության աշխատակիցները հերթական անգամ փորձել են կանխել ֆիզիկական անձանց բեռի անվան տակ ձեռնարկատիրական նշանակության ապրանքների ներկրումը Հայաստան։ Այս մասին այսօր՝ մայիսի 10–ին կառավարությունում լրագրողների հետ ճեպազրույցում հայտարարեց ՊԵԿ նախագահ Դավիթ Անանյանը՝ անդրադառնալով երեկ Բագրատաշենի անցակետում Թուրքիայից ժամանած ավտոբուսներին սահմանը հատելն արգելելու մասին տեղեկությանը։
«Բազմիցս հնարավորություն ունեցել ենք ասելու, որ Թուրքիայի ավտոբուսներով ֆիզիկական անձին ուղեկցող բեռի անվան տակ իրականում բերվում են ձեռնարկատիրական նշանակության ապրանքներ։ Խնդիրն այն է եղել, որ մենք հերթական անգամ փորձել ենք կանխել դա»,–ասաց նա՝ նշելով, որ խնդիրը կարգավորվել է փոխգործակցության շրջանակներում։
Հիշեցնենք, որ երեկ՝ մայիսի 9–ին Բագրատաշենի անցակետում Թուրքիայից ժամանած ավտոբուսներին չէին թողնում սահմանը հատել: 100-ից ավել մարդ չի կարողացել 25 կգ–անոց բեռն անցկացնել։ Քաղաքացիների պնդմամբ՝ բերված հագուստն իրենց անձնական օգտագործման համար է եղել։