![](img/news/05/12/default.jpg)
Համաշխարհային տնտեսական ճգնաժամի առաջին ալիքը բացասական առումով այնքան էլ մեծ ազդեցություն չթողեց Հայաստանի տնտեսության վրա: Այս մասին Երեւանում մեկնարկած «Համաշխարհային ճգնաժամի ազդեցությունը Հայաստանի վրա. Կարճաժամկետ և երկարաժամկետ հեռանկարներ» թեմայով միջազգային համաժողովում հայտարարել է ՀՀ վարչապետ Տիգրան Սարգսյանը:
«Հայաստանը ունի ամուր բանկային համակարգ, բարձր կապիտալիզացիայի և լիկվիդայնության մակարդակ, և դա հնարավորություն տվեց դիմակայել բացասական երևույթներին: Ճգնաժամի առաջին լուրջ ազդեցությունը երկրում զգացվեց համաշխարհային շուկայում հումքային ապրանքների գների անկման ժամանակ: Դրա արդյունքում կտրուկ անկում ապրեց արտահանումը, քանի որ Հայաստանի հանքահումքային արդյունաբերությունն այլևս ի վիճակի չէր դրսում սպառել իր արտադրանքը», — ասաց նա:
Վարչապետի խոսքերով, հաջորդ բացասական ազդեցությունը մասնավոր ներդրումների և տրանսֆերտների կրճատումն էր: Բացի դրանից, տնտեսական ճգնաժամն իր ազդեցությունը թողեց փոխարժեքի վրա: Նվազեցին շինարարության աճի տեմպերը: «5 ամսվա ընթացքում ունենք 16 տոկոս անկում, որը պայմանավորված է շինարարության ոլորտի անկմամբ: Այս ամենն իր ազդեցությունը թողեց հարկահավաքության և պետբյուջեի կատարման վրա: Արդյունքում կրճատվեցին բյուջետային ծախսերը», նշեց Տիգրան Սարգսյանը:
ՀՀ վարչապետը համոզված է, որ պետք է ունենանք զարգացման 3 սցենար` առաջին` 9.5 տոկոս անկում, երկրորդ` 16 տոկոս, երրորդ` 20 տոկոս: Բյուջեի ծախսային մասը պլանավորվում է մոտ 900 մլրդ դրամ: 2009թ. Հայաստանն ունենալու է 7.5 տոկոս բյուջեի դիֆիցիտ: Այդ դիֆիցիտը հաղթահարելու համար հիմնական միջոցները ստացվելու են Ասիական բանկից` 70 մլն դոլար, Համաշխարհային բանկից` 60 մլն դոլար, 24 մլրդ դրամ ռուսական վարկից և ներքին շուկայից ևս 24 մլրդ դրամ, իսկ ամենախոշոր ներդրումը կանի Արժույթի միջազգային հիմնադրամը`Հայաստանին տրամադրելով 150 մլն դոլար վարկ:
Ըստ Տիգրան Սարգսյանի, տնտեսական ճգնաժամը հաղթահարելու համար հարկավոր է ձեռնարկել մի շարք քայլեր: Նախ պետք է նվազեցնել շինարարության, գյուղատնտեսության և սպասարկման տեսակարար կշիռը տնտեսության մեջ և զարգացնել մյուս ոլորտները: Երկրորդ կարևորագույն խնդիրը դեռևս պահպանվող օլիգապոլիաների խնդիրն է, որն էապես նվազեցնում է գների էլաստիկությունը Հայաստանում, և երրորդը ստվերային տնտեսության խնդիրն է, որը պայմանավորված է հարկային և մաքսային վարչարարության ցածր մակարդակով: Վարչապետը ընդգծել է հարկային ոլորտի բարելավման անհրաժեշտությունը եւ հավելել, թե դա շատ ավելի բարդ խնդիր է, քան ենթադրվում էր ի սկզբանե: