Կառավարությունն իր այսօրվա՝ հուլիսի 4-ի նիստում հավանություն տվեց «Հայաստանի Հանրապետության կառավարության եւ Սինգապուրի Հանրապետության կառավարության միջեւ եկամուտների կրկնակի հարկումը բացառելու եւ հարկերի վճարումից խուսափելը կանխելու մասին» համաձայնագրի ստորագրման առաջարկությանը:

Հարցը ներկայացրեց ֆինանսների նախարար Ատոմ Ջանջուղազյանը՝ նշելով, որ Հայաստանը նմանատիպ համաձայնագրեր է կնքել 46 երկրի հետ. «Նախաստորագրման փուլում է 3 երկրի հետ, եւս 15 երկրի հետ գործընթացըւ գտնվում է տարբեր փուլերում»,-ասաց նա:

«Այս համաձայնագիրը նախատեսվում է ստորագրել հուլիսի 7-ից 9-ն ընկած ժամանակահատվածում, երբ վարչապետ Նիկոլ Փաշինյանը գտնվելու է Սինգապուրում»,- տեղեկացրեց փոխվարչապետ Տիգրան Ավինյանը։

ՀՀ արտաքին գործերի նախարար  Զոհրաբ Մնացականյանն էլ ասաց, որ ցանկանում է շնորհավորել ու շնորհակալություն հայտնել Ֆինանսների նախարարին ու գործընկերներին, որոնք շատ հաջող բանակցեցին ու ավարտին հասցրեցին պայմանագիրը. «Ինքը շատ կարեւոր նշանակություն ունի: Սա շատ ողջունելի ու պրակտիկ արտահայտում է այն նպատակները, որոնք մենք հետապնդում ենք այդ տարածաշրջանում եւ այդ երկրի հետ», - ասաց նախարարը։