Հայաստանի Ազգային ժողովը շարունակել է հավաքների մասին օրենսդրության քննարկումները։

Փաստաթուղթը ներկայացնելով՝ արդարադատության նախարար Հրայր Թովմասյանն ընդգծեց, որ նա նույնացնում է քաղաքական հավաք, տոնակատարություն եւ ակցիա հասկացությունները։ Բացի այդ, նախատեսվում է մտցնել «բանակցությունների ինստիտուտ» հասկացությունը, այսինքն՝ ակցիայի կազմակեպիչները դրա անցկացման, տեղի եւ ժամի մասին կարող են բնակցություններ վարել իրավասու մարմինների հետ եւ գալ փոխհամաձայնության։

Հավաքները կարող են ընդհատվել միայն այն դեպքում, երբ խախտվում են որեւէ մեկի սահմանադրական իրավունքները եւ հասարակական շահը։ Եթե ակցիան խաղաղ է, սակայն իրավասու մարմինները դրա անցկացման մասին չեն տեղեկացվել, իրավապահ մարմիններն իրավունք չունեն դադարեցնել ակցիան։

Իր հերթին փաստաթղթի վերաբերյալ սեփական առաջարկությունն է արել խորհրդարանի խոսնակ Հովիկ Աբրահամյանը՝ նշելով, որ պետք է վերանայել օրենսդրության 7-րդ կետը։ «Առաջարկում եմ 7-րդ հոդվածում ամրագրել հետեւյալ կետը. հավաքի կազմակերպիչը դրա ղեկավարն է։ Եթե հավաքը կազմակերպվել է իրավաբանական անձի կամ իրավաբանական անձանց խմբի կողմից, ուրեմն հավաքի ղեկավարը հանդիսանում է այդ իրավաբանական անձանց ղեկավարը»,- հայտարարեց Աբրահամյանը։

Նրա առաջարկը հիմնականում Հայ ազգային կոնգրեսին էր վերաբերում։ Աբրահամյանը ցանկանում էր իմանալ՝ օրենքով ո՞վ է ՀԱԿ-ի կազմակերպած հանրահավաքների ղեկավարը:

Արդարադատության նախարարն ընդունելի համարեց առաջարկը։ Թովմասյանը միաժամանակ ընդգծեց, որ ՀԱԿ-ը իրավաբանական-կազմակերպչական կարգավիճակ չունի։ Իսկ եթե խոսքը կոնկրետ ՀԱԿ-ի մասին է, ապա, նախարարի խոսքով, օրենքում կամ պետք է փոփոխություններ մտցնել կամ էլ դա այն օրենքը չէ, որ պետք է կարգավորի նմանօրինակ հարցերը։

Սակայն այս պատասխանը չբավարարեց Հովիկ Աբրահամյանին, ով ամեն դեպքում ասաց նախարարին. «Դե, մեկ անգամ էլ քննարկեք»։