Իրանը, անկասկած, միջուկային գործարքով պարտավորությունների կրճատման երրորդ քայլին կդիմի, եթե այդ թեմայի շուրջ բանակցությունները արդյունք չտան: Այս մասին հայտարարել է Իրանի նախագահի աշխատակազմի ղեկավար Մահմուդ Վաեզին, հայտնում է ՏԱՍՍ-ը:
«Այն դեպքում, եթե բանակցություններում առաջընթաց չլինի, միջուկային գործարքի շրջանակում պարտավորությունների կրճատման երրորդ քայլը անխուսափելի կլինի», - Tasnim-ը մեջբերում է Վաեզիի խոսքը: Միեւնույն ժամանակ, նա նշել է «ֆրանսիական կողմի հետ խորհրդակցությունների դրական դինամիկան»:
2019 թվականի մայիսի 8-ին Ռոհանին հայտարարել էր, որ Թեհրանը դադարեցնում է միջուկային գործարքով պարտավորությունների մի մասի կատարումը եւ մյուս մասնակիցներին 60 օր ժամանակ է տալիս դրանց կատարմանը վերադառնալու համար: Հուլիսի 7-ին Թեհրանն անցել էր կասեցման երկրորդ փուլին (հայտարարել էր 3,67 տոկոսից ավելի ուրանի հարստացման մասին) եւ խոստացել յուրաքանչյուր 60 օրը մեկ պարտավորությունները կրճատել, եթե մյուս մասնակիցները չհետեւեն ձեռք բերված պայմանավորվածություններին: