Ես ասել եմ, որ ինձ համար անընդունելի է, երբ 30 տարվա պատմություն կերտած նախագահներից մեկը գտնվում է անազատության մեջ: Այս մասին այսօր՝ հոկտեմբերի 7-ին, Երեւանի ընդհանուր իրավասության դատարանի Շենգավիթի նստավայրում լրագրողների հետ զրույցում ասաց Պաշտպանության նախկին նախարար Սեյրան Օհանյանը:
Անդրադառնալով մի շարք հասարակական-քաղաքական գործիչների ստորագրահավաքին, որով պահանջում են, որ Ռոբերտ Քոչարյանը լինի ազատության մեջ, Սեյրան Օհանյանն ասաց. «Այն քաղաքական-հասարակական գործիչները, որոնք գնահատում են իրավիճակը, համապատասխան միջոցներ ձեռնարկում են: Կարելի է այդ ամենը իրականացնել եւ թույլ տալ նաեւ, որ ինքը լինի ազատության մեջ` առավել եւս, որ Ռոբերտ Քոչարյանը հանգիստ, համարձակ եկել, ներկայացել է, երբ անհրաժեշտ է եղել: Ինչ պահանջներ դնում են նրա առջեւ, նա կատարում է:
Կարծում եմ, որ եթե ինքը լինի անազատության մեջ, ինքը ոչ մի բանի չի կարող խոչընդոտել, առավել եւս, որ նախաքննական մարմինը իր գործը կատարել է: Այն մարդիկ, որոնք տարբեր տիպի իրադրության համապատասխան ցուցմունքներ են տվել, իրենք իրենց ցուցմունքների տերն են: Չեմ կարծում, թե ինքը կարող է նրանց հետ առնչություն ունենալ եւ ինչ-որ կերպ ազդել: Ռոբերտ Քոչարյանը ցուցմունք տված այդ հազար զինծառայողների հետ որեւէ առնչություն չի ունեցել: Ես ամենամոտ մարդկանցից մեկն եմ եղել որպես գլխավոր շտաբի պետ: Ռոբերտ Քոչարյանը ինձ որեւէ ցուցում, որեւէ հրաման չի տվել, առավել եւս մնացածին»:
Դիտարկմանը, որ հասարակական, քաղաքական գործիչներն իրենց հայտարարության մեջ նշում են, որ Քոչարյանի անազատության մեջ լինելը կարող է երկու հայկական պետությունների համար լուրջ սպառնալիք լինել, նա արձագանքեց. «Ով նշել է իրենցից հարցրեք, չեմ հասկանում՝ ինչի մասին եք ասում»: