Մենք ոչ մի անհանգստություն չունենք՝ «Սանիթեքի» արբիտրաժային դատարան դիմելու հետ կապված։ Այս մասին լրագրողների հետ զրույցում հոկտեմբերի 8-ին ասել է Երեւանի քաղաքապետ Հայկ Մարությանը։

Նրա խոսքով՝ ավելի շատ հարցեր է առաջացնում «Սանիթեքի» հետ պայմանագրի կնքման գործընթացը, ինչպես նաեւ ընկերության ողջ գործունեությունը։ «Այս հարցով մենք արդեն մի անգամ դիմել ենք դատախազություն եւ փաստերի հավաքումից հետո նորից կդիմենք»,- նշել է նա։

Հայկ Մարությանն ընդգծել է, որ առաջիկա ամիսներին վերջնականապես կավարտվի տեխնիկայի եւ կադրերի ներգրավման գործընթացը աղբահավաքման հարցով, եւ հիմա արդեն նկատելի է դրական արդյունք։ «Այժմ արդեն կան 4 հազար աղբամաններ, այն դեպքում, երբ նախատեսված է ընդհանուր առմամբ քաղաքն ապահովել 9 հազար աղբամաններով։ Բացի այդ, նախատեսված է մեքենաների թիվը հասցնել 54-ի»,- ասել է նա՝ ավելացնելով, որ չկա անհանգստանալու առիթ, թե կարող է ստեղծվել իրավիճակ, որը տեղի ունեցավ «Սանիթեք» ընկերության հետ, որը միակ օպերատորն էր, քանի որ այս պարագայում ամբողջ պատասխանատվությունն ուղղակի կրելու է քաղաքապետարանը։

Մարությանը նշեց, որ հարցի համակարգային լուծման համար տարվում է միջգերատեսչական աշխատանքային խմբի աշխատանք, եւ փոխվարչապետի մակարդակով պարբերաբար տեղի են ունենում հանդիպումներ եւ քննարկումներ։

Հիշեցնենք, որ հոկտեմբերի 3-ին իր հրապարակային ելույթում Երեւանի քաղաքապետ Հայկ Մարությանն ասաց, որ պայմանագրերը «Սանիթեքի» հետ լիովին խզված են։