Ղարաբաղի հարցում մեր առավելությունը մեր միասնության մեջ է: Այս մասին հոկտեմբերի 23-ին լրագրողների հետ զրույցում հայտարարեց Մարդկային զարգացման միջազգային կենտրոնի նախագահ Թեւան Պողոսյանը:
Նրա խոսքով՝ հստակ տեսանելի է աշխատանքը միջազգային ասպարեզում՝ հաշվի առնելով Ադրբեջանում տեղի ունեցած վերջին ներքին իրադարձությունները, ինչի հետ կապված է Բաքվի հռետորաբանությունը, Վալդայում Ալիեւի հայտարարությունն ու ռազմական բյուջեի մեծացումը: «Այդ ամենը վկայում է Բաքվի կողմից սպառազինությունների մրցավազքի մասին, եւ դրա պատասխանը պետք է լինի մեր տնտեսության, ռազմարդյունաբերական համալիրի զարգացումը, սակայն ցանկալի փոփոխություններ դեռեւս չկան»,- նշեց նա՝ հավելելով, որ Բաքուն երբեք չի թաքցրել, որ չի ցանկանում բանակցություններ վարել եւ հաճախ հայտարարում է, որ Հայաստանի այս կամ այն տարածք ադրբեջանական է:
Պողոսյանը կարծում է, որ հայկական կողմի պատասխանը պետք է անհամաչափ լինի, որպեսզի Ալիեւը՝ ինչ-որ քայլեր ձեռնարկելով, հասկանա, որ դրանք հետագայում լուրջ հետեւանքների կհանգեցնեն: «Անհրաժեշտ է մեր հանրությանը նախապատրաստել, որպեսզի այն չենթարկվի Բաքվի տեղեկատվական ազդեցությանը, կարեւոր է հենց մեր իշխանություններին վստահելը»,- նշեց նա:
Փորձագետը նկատեց, որ շատ կարեւոր է Ղարաբաղում պատշաճ մակարդակով ընտրությունների անցկացումը: «Պետք է հասկանալ, որ այդ ընտրություններն անցկացվում են Ղարաբաղի բնակիչների համար, եւ անցանկալի են Հայաստանից որոշ դրսեւորումներ, ինչպես օրինակ՝ այս կամ այն հերոսի որակները կասկածի տակ դնելու փորձերը: Բացի այդ, կարեւոր է առավելագույն քանակով արտասահմանցի դիտորդներ եւ արտասահմանյան մամուլ ներգրավելը»,- հավելեց նա:
