Պենտագոնը ներկայացրել է արշավի մանրամասները, որի ընթացքում սպանվել է «Իսլամական պետության» առաջնորդ Աբու Բաքր ալ Բաղդադին:
ԱՄՆ Կենտրոնական հրամանատարության ղեկավար, գեներալ Քեննեթ ՄըքՔենզին ներկայացրել է արշավի մանրամասները՝ նշելով, որ ԱՄՆ-ն պատրաստ է ծայրահեղականների կողմից «վրեժխնդրության հնարավոր հարձակումներին»:
Նրա խոսքով՝ ալ Բաղդադիի աճյունը թաղվել է ծովում՝ ստորգետնյա թունելում նրա մահից հետո 24 ժամվա ընթացքում, ուր նա փախել էր, երբ ամերիկացի հատուկջոկատայինները մոտեցել էին նրան:
Պենտագոնը հրապարակել է գիշերային գործողության առաջին լուսանկարները եւ տեսահոլովակները, այդ թվում՝ Delta Force մարտական կոմանդոսը, որոնք մոտենում են համալիրի պատերին, որտեղ հայտնաբերվել էին ալ Բաղդադին եւ մյուսները:
ԱՄՆ-ն զինվորների կողմից առաքելությունն ավարտելուց հետո համալիրը ռմբակոծել էր, որպեսզի այն ուխտագնացության վայր չդառնա: «Հիմա այդ վայրը նման է մեծ փոսերով կայանատեղիի»,- ասել է ՄըքՔենզին:
Նրա խոսքով՝ ամերիկացի զինվորականները տարածքին մոտեցել են ուղղաթիռով:
Նա հայտնել է, որ ալ Բաղդադիի հետ զոհվել են 2 երեխաները, երբ նա պայթեցրել է ռումբով բաճկոնակը: Նա ասել է, որ երեխաներն, ըստ երեւույթին, 12 տարեկան չկային: Մյուս 11 երեխաները համալիրից անվնաս տարհանվել են: Չորս կին եւ 2 տղամարդ, որոնք մահապարտի գոտիներով էին եւ հրաժարվել էին հանձնվել, սպանվել են:
Գներալը նշել է, որ արշավի ժամանակ վիրավորված շունը ԱՄՆ հատուկ գործողությունների հրամանատարության վետերանն է եւ մասնակցել է մոտ 50 մարտական գործողության: Շունը վիրավորվել է թունելում էլեկտրական մալուխների պատճառով այն բանից հետո, երբ ալ Բաղդադին բաճկոնակը պայթեցրել է: Կոնան անունով շունը Մերձավոր Արեւելքը կլքի եւ Սպիտակ տուն կայցելի հաջորդ շաբաթ, ավելի վաղ գրել էր ԱՄՆ նախագահ Դոնալդ Թրամփը:
Ալ Բաղդադին նույնականացվել է 2004 թվականին Իրաքում, որտեղ կալանավորված էր, ԱՄՆ ուժերի կողմից վերցված նմուշի հետ նրա ԴՆԹ-ն համեմատելու ճանապարհով:
ՄըքՔենզին ասել է, որ ԱՄՆ-ին հաջողվել է արշավի ընթացքում հավաքել «զգալի» քանակությամբ փաստաթղթեր եւ էլեկտրոնիկա:
Չնայած արշավը հաջող էր, ՄըքՔենզին ասել է, որ սխալ կլիներ կարծել, թե «Իսլամական պետությունն» ամբողջությամբ ջախջախվել է:
«Նրանց անհրաժեշտ կլինի որոշ ժամանակ նոր առաջնորդ գտնելու համար, այդ ժամանահատվածում նրանց գործողությունները կարող են լինել մի փոքր անջատ-անջատ,- ասել է գեներալը: - Նրանք վտանգավոր կլինեն: Մենք կասկածում ենք, որ նրանք փորձելու են վրեժխնդիր լինել, մենք դրան պատրաստ ենք»:
Գործողությունն ընդհանուր նկարագրելով՝ ՄըքՔենզին ասել է, որ ալ Բաղդադին բավականին երկար ժամանակահատվածում է եղել Սիրիայի հյուսիսարեւմտյան նահանգ Իդլիբի համալիրում:
ՄըքՔենզին ալ Բաղդադիի կյանքի վերջին պահերի մասին նոր մանրամասներ չի ներկայացրել:
«Նա երկու փոքր երեխաների հետ սողաց փոսի մեջ եւ իրեն պայթեցրեց, մինչ նրա մարդիկ մնացել էին տեղերում»,- ասել է նա:
