Հայ փախստականներն Ադրբեջանից պետք է քաղաքական գործոն դառնան ղարաբաղյան հակամարտության կարգավորման բանակցային գործընթացում։ Այս մասին նոյեմբերի 25-ին լրագրողների հետ հանդիպման ժամանակ ասաց Ադրբեջանական ԽՍՀ-ից փախստականների Կոնգրեսի համակարգող Մարիամ Ավագյանը։
Նրա խոսքով՝ Հայաստանը դեռ համապատասխան գնահատականներ չի տվել 130 տարի շարունակվող ցեղասպանության տարրերին, որոնք տեղի են ունեցել Բաքվում, Սումգաիթում եւ Ադրբեջանի այլ քաղաքներում ու գյուղերում 20-րդ դարավերջին։ «Հայաստանի իշխանությունների հայտարարությունները Ղարաբաղի ժողովրդի իրավունքների մասին հնչում են միայն ի պատասխան ադրբեջանական հարձակումների, ինչը վկայում է այն մասին, որ մենք շարունակում ենք հանդես գալ զոհի դիրքերից եւ միայն արձագանքում են նրան, թե ինչ են ասում։ Բացի այդ, հեղափոխական իշխանությունները ոչինչ չեն խոսում Բաքվում, Սումգաիթում, Նախիջեւանում եւ Ադրբեջանի հայաբնակ այլ տարածքներում տեղի ունեցած իրադարձությունների մասին, այն դեպքում, երբ թե՛ Բաքուն, թե՛ Անկարան մինչեւ օրս չեն թաքցնում իրենց հավակնություններն ընդհանուր միավորում ստեղծելու մասին, որին խանգարում է Հայաստանը»,- նշել է Ավագյանը։
ՀԿ համակարգողը խոսեց նաեւ Ղարաբաղում միջազգային զորքերի հավանական տեղակայման դեմ՝ ավելացնելով, որ անվտանգության միակ երաշխավորն այնտեղ ԼՂՀ պաշտպանության բանակն է։
Անդրադառնալով փախստականների 112 ընտանիքի բնակարան տրամադրելու կառավարության վերջին որոշմանը՝ նա գոհունակություն հայտնեց, որ գործը մեռյալ կետից շարժվել է։ «Այդ որոշումը կվերաբերի Երեւանի 5 վարչական շրջանների բնակիչներին։ Հույս ունենք, որ այն շարունակություն կունենա»,- ամփոփել է Մարիամ Ավագյանը։