Դեկտեմբերի 4-ին Ն.Ս.Օ.Տ.Տ. Գարեգին Երկրորդ Ծայրագույն Պատրիարք եւ Ամենայն Հայոց Կաթողիկոսը Մայր Աթոռ Սուրբ Էջմիածնում ընդունեց Հայաստանի Հանրապետությունում Լիտվայի Հանրապետության արտակարգ եւ լիազոր դեսպան Ինգա Ստանիտե-Տոլոչկիենեին:
Իր բարեմաղթանքները փոխանցելով դեսպանին առաքելության ստանձնման առիթով` Վեհափառ Հայրապետը գոհունակությամբ անդրադարձավ Լիտվայի եւ Հայաստանի միջեւ ձեւավորված դիվանագիտական հարաբերություններին եւ սերտ գործակցությանը: Ամենայն Հայոց Կաթողիկոսը նաեւ խոսեց Լիտվայի հայ համայնքի եւ նրա հոգեւոր խնամքի մասին:
Զրույցի ընթացքում Նորին Սրբությունը վերհիշեց արցախյան գոյապայքարի սկզբնավորման օրերին հայ ժողովրդին լիտվացիների կողմից ցուցաբերված զորակցությունը:
Դեսպան Ինգա Ստանիտե-Տոլոչկիենեն եւս անդրադարձ կատարեց երկկողմ հարաբերություններին եւ դրանց ընդլայնման ուղղությամբ տարվող աշխատանքներին` կարեւորելով նաեւ փորձի փոխանակումը երկու երկրների միջեւ: Լիտվայի հայ համայնքի առնչությամբ տիկ. Ստանիտե-Տոլոչկիենեն հաստատեց, որ հայերը հարգված քաղաքացիներ են, որ իրենց օգտակար ներդրումն են բերում տարբեր ոլորտներում:
Հանդիպմանը խոսվեց նաեւ Քույր Եկեղեցիների հետ Հայաստանյայց Առաքելական Եկեղեցու փոխհարաբերությունների մասին:
Վերջում դեսպանն այցելեց Մայր Աթոռի թանգարաններ` ծանոթանալով Մայր Աթոռում պահպանվող հոգեւոր-մշակութային արժեքներին:
