Հայաստանի խորհրդարանը 80 «կողմ», 1 «դեմ» եւ 1 «ձեռնպահ» ձայներով վավերացրել է երկրի տարածքում ռուսական ռազմաբազայի տեղակայման ժամկետների երկարաձգման մասին արձանագրությունը։

Ինչպես խորհրդարանի ամբիոնից հայտարարեց Հայաստանի պաշտպանության փոխնախարար Արա Նազարյանը, արձանագրությունում, մասնավորապես, ասվում է, որ Ռուսաստանն աջակցելու է երկրի անվտանգության ապահովմանը, ինչն ավելի է կոնկրետացնում գործող այն նորմը, որ Ռուսաստանը պաշտպանում է նախկին Խորհրդային Հայաստանի սահմանների անվտանգությունը։ Նրա խոսքով, սրանով շրջանառությունից հանվում է միտքն այն մասին, որ ռուսական ռազմաբազան կոչված է Հայաստանի սահմանները պաշտպանել միայն Իրանի եւ Թուիրքիայի մասով։

Բացի այդ, ընդգծեց փոխնախարարը, փաստաթուղթը նախատեսում է, որ Ռուսաստանը Հայաստանին  ապահովելու է մարտական ժամանակակից տեխնիկայով եւ զինամթերքով։ Արա Նազարյանի խոսքով, փաստաթղթի հիմնական կետը Հայաստանում ռուսական ռազմաբազայի տեղակայման ժամկետները 25-ից 49 տարի երկարաձգելն է։