ԵՄ-Հայաստան համագործակցությունը երբեւէ այսքան սերտ եւ արդյունավետ չի եղել, որքան հիմա: Այս մասին նշվել է այսօր` ապրիլի 12-ին հրավիրել է Եվրոպական կառույցների հետ ՀՀ պետական մարմինների համագործակցությունը համակարգող միջգերատեսչական հանձնաժողովի 9-րդ նիստի ժամանակ:
ԱԱԽ մամուլի գրասենյակից NEWS.am-ին հայտնում են, որ նիստը, որը տեղի է ունեցել Հայաստանում ԵՄ պատվիրակության գրասենյակում, վարել է ԱԱԽ քարտուղար Արթուր Բաղդասարյանը:
Նա շեշտել է, որ 9-րդ նիստը կնպաստի միջգերատեսչական հանձնաժողովի եւ ԵՄ խորհրդատվական խմբի հարաբերությունների խորացմանը: Այս հանդիպումը թույլ կտա միջգերատեսչական հանձնաժողովին ԵՄ Խորհրդատվական խմբի հետ համատեղ սկսելու հանրային իրազեկվածության մակարդակի բարձրացմանն առնչվող ծրագիրը` բաղկացած ամենամսյա քննարկումներից, որոնք առնչվելու են ԵՄ-Հայաստան ԵՀՔ գործողությունների ծրագրի իրականացման խնդիրներին: Առաջին քննարկումը տեղի կունենա ապրիլի 29-ին «Մտավոր սեփականության իրավունք» թեմայով:
Երկու ժամ տեւողությամբ հանդիպման ընթացքում միջգերատեսչական հանձնաժողովի անդամ, ԱԳ փոխնախարար Կ. Ղազինյանը զեկուցել է ՀՀ-ԵՄ Ասոցացման համաձայնագրի բանակցությունների ուղղությամբ տարված աշխատանքների մասին, իսկ միջգերատեսչական հանձնաժողովի մյուս անդամները ներկայացրին 2011 թվականի առաջին եռամսյակի ընթացքում կատարված աշխատանքները:
ԵՄ Խորհրդատվական խմբի ղեկավար Անթի Հարթիկայնեն ներկայացրել է խորհրդատվական խմբի 3-րդ փուլի խնդիրները եւ նախատեսվող գործողությունները:
