«Ֆրանսիա-Արցախ» բարեկամության շրջանակը հաղորդագրություն է տարածել Բաքվի ջարդերի 30-ամյա տարելիցի կապակցությամբ:
Հայտարարությունում, մասնավորապես, ասվում է. «Անկախությունը արցախցիների կյանքի իրավունքի միակ երաշխիքն է:
Բաքվի հայկական ջարդերից 30 տարի անց Ադրբեջանը շարունակում է հակահայկական ռասիզմը կիրառել որպես պետական քաղաքականության առաջնահերթություն:
«Ֆրանսիա-Արցախ» բարեկամության շրջանակը միանում է ողջ աշխարհի հայությանը եւ Արցախի Հանրապետության իշխանություններին՝ ոգեկոչելու Բաքվի ջարդերի 30-ամյա տարելիցը:
Այդ օրը Ադրբեջանի Խորհրդային Սոցիալիստական Հանրապետության ղեկավարների ցուցումով հարյուրավոր հայեր զոհ դարձան Ադրբեջանի մայրաքաղաքում կազմակերպված ջարդերին: Ըստ պաշտոնական աղբյուրների՝ զոհվեց 90 եւ վիրավորվեց 700 մարդ: Ադրբեջանը իրականացրեց այս ջարդերը՝ ի պատասխան Լեռնային Ղարաբաղի հայերի խաղաղ եւ ժողովրդավարական պահանջին:
«Կոտորածներն ադրբեջանական իշխանությունների կողմից հասարակության խտրական տեսլականի արդյունքն էր, որն այսօր նույնպես Բաքվի ռեժիմի վարած քաղաքականության մասն է կազմում», հայտարարել է Ֆրանսիա-Արցախ Բարեկամության շրջանակի նախագահ Գի Տեսիեն:
Շրջանակը հիշեցնում է, որ Սումգայիթի, Կիրովաբադի եւ Բաքվի ջարդերը ադրբեջանական իշխանությունների՝ Լեռնային Ղարաբաղից ողջ հայ բնակչությունը արմատախիլ անելուն միտված լայնածավալ զինված հարձակման նախաբանն էին: Ադրբեջանի կողմից պարտադրված պատերազմը, որից 1994 թ. Լեռնային Ղարաբաղի հայերը հաղթանակով դուրս եկան, վերջիններիս դրդեց բնաջնջումից խուսափելու համար անկախություն հռչակել: Շրջանակը հիշեցնում է նաեւ, որ բազմաթիվ առիթներով Ադբրեջանի բռնապետ նախագահ Իլհամ Ալիեւը «ողջ աշխարհի հայերին» բնորոշել է որպես «Ադբրեջանի թշնամիներ», եւ որ Ադրբեջանի քաղաքականության տեւական եւ գիտակցված այս գիծը Հարավային Կովկասում վերջնական խաղաղության հաստատման հիմնական խոչընդոտն է:
«Բանակցություններ սկսելու համար նախ պետք է ընդունել հակառակորդի գոյությունը եւ չոտնահարել նրա անքակտելի իրավունքները։ Երբ Ադրբեջանի նախագահը պարգեւատրում է հայատյաց մարդասպան Ռամիլ Սաֆարովին, երբ նա այրում է հայ հեղինակների գրքերը, ձերբակալում է Արցախ այցելած զբոսաշրջիկներին, կամ իր երկրում ոչնչացնում է հայկական մշակութային ժառանգությանը պատկանող կոթողները, դրանով իսկ ապացուցում է, որ պատրաստ չէ բանակցելու եւ, առավել եւս, խաղաղության համաձայնագիր կնքելու», եզրափակել է Գի Տեսիեն:
Ֆրանսիա-Արցախ բարեկամության շրջանակը կոչ է անում ԵԱՀԿ Մինսկի խմբին հաշվի առնել Հարավային Կովկասում առկա քաղաքական իրողությունները եւ ապահովվել Արցախի Հանրապետության վերադարձը բանակցությունների սեղան՝ համաձայն 1994 թվականին կնքված զինադադարի պայմանագրի դրույթների:
