Սոցիալ-դեմոկրատական Հնչակյան կուսակցությունը դատապարտել է Վրաստանի իշխանությունների հակահայ քաղաքականությունը՝ Ջավախքի հայ ազգաբնակչության նկատմամբ:
Սեպտեմբերի 26-ից 29-ը Հայաստանում կայացել է ՍԴՀԿ հերթական 19-րդ համագումարը, որին մասնակցել են Հայաստանի եւ Սփյուռքի հայաշատ տարբեր քաղաքներից ժամանած պատվիրակներ:
Կուսակցությունն իր տարածած հայտարարության մեջ անդրադարձել է հայությանը հուզող մի շարք խնդիրների: Մասնավորապես հայ-թուրքական մերձեցման վերաբերյալ հնչակյանները նշել են, որ Հայաստանի Հանրապետությունը Թուրքիայի հետ հարաբերություններ հաստատելիս չի կարող անտեսել պատմության դառը փորձը: «Մեկնելով այս իրողությունից` ՍԴՀԿ-ը մերժում է Թուրքիայի հետ ներկա սահմանները ընդունող որեւէ արձանագրություն, մերժում է թուրքական ժխտողական պատմագրության ներկայացուցիչների հետ հայ եւ թուրք պատմաբաններից բաղկացած ցանկացած հանձնաժողով»,- նշել են հնչակյանները, իսկ ԼՂ կարգավորման գործընթացի մասով էլ նկատել, որ Լեռնային Ղարաբաղի հարցը պետք է լուծվի ազգերի ազատ ինքնորոշման իրավունքի միջազգային սկզբունքի համաձայն. « Համագումարն անընդունելի է համարում մեզ պարտադրվող Մադրիդյան սկզբունքները, որոնք ենթադրում են միակողմանի զիջումներ հայկական կողմից: Համագումարը համարում է, որ Արցախի համար ոչ նպաստավոր այս առաջարկները հետեւանք են բանակցային գործընթացից Լեռնային Ղարաբաղի Հանրապետության դուրս մղման»:
ՍԴՀԿ-ն անդրադարձել է նաեւ ջավախքի խնդիրներին եւ լուրջ մտահոգություն հայտնել: «Վրացական իշխանությունների վարած ազգայնամոլ քաղաքականությունը դրսեւորվում է հայ բնակչության քաղաքացիական իրավունքների ոտնահարմամբ: Ջավախքում հետեւողականորեն արգելափակվում են հայության ազգային համախմբանը ուղղված բոլոր ճիգերն ու քայլերը: ՍԴՀԿ-ն դատապարտում է վրացական իշխանությունների հակահայ քաղաքականությունը եւ զորավիգ է կանգնում ջավախահայության իրավունքներին»,- ասված է հայտարարության մեջ:
Քննարկելով Հայաստանի ներկա քաղաքական իրավիճակը, համագումարն արձանագրել է, որ Հայաստանն այժմ գտնվում է ժողովրդավարության միջազգային չափանիշներից հեռու: «Հայաստանում այսօր առկա են օրինականության, մարդու իրավունքների, խոսքի ազատության, սոցիալական արդարության եւ ազատ մրցակցության սկզբունքների լուրջ ոտնահարումներ: Հնչակյան կուսակցությունը համոզված է, որ վերոնշյալ խնդիրները կարելի է լուծել միայն հասարակության վստահությունը վայելող իշխանության միջոցով»,- նշել են հնչակյանները եւ հավելել, որ կուսակցությունը «Հայաստանում շարունակելու է ձգտել վերականգնելու ժողովրդավարությունը, օրինականությունը եւ սահմանադրական կարգը»: