Եվրոպական միությունն այլ «ընտրություն չունի»՝ ԱՄՆ-ի հետ առեւտրային նոր գործարքի մասին պայմանավորվելուց բացի,- ասել է ԱՄՆ նախագահ Դոնալդ Թրամփը CNBC-ի հարցազրույցում։
Նախօրեին Թրամփը հանդիպել է Եվրահանձնաժողովի նախագահ Ուրսուլա ֆոն դեր Լեյենի հետ Դավոսի Համաշխարհային տնտեսական համաժողովում։ Նա հարցազրույցում նշել է, որ իրենց միջեւ տեղի է ունեցել «հիանալի խոսակցություն»։
Շարունակվող ոչ ֆորմալ բանավեճերի ֆոնին Թրամփը սպառնացել է տուրքեր մտցնել եվրոպական ավտոմեքենաների վրա։ Հանդիպման ժամանակ նա ֆոն դեր Լեյենին ասել է, որ առեւտրային գործարքի բացակայության պայմաններում նա ստիպված կլինի «միջոցներ ձեռնարկել» «շատ բարձր տուրքերի ձեւով՝ մեքենաների եւ այլ ապրանքների վրա»։
Թրամփի խոսքով՝ Եվրոպայի հետ «շատ դժվար է գործ ունենալ», բայց ԵՄ-ը հիմա «այլ ընտրություն չունի», բացի գործարք կնքելը։ «Մենք հսկայական դեֆիցիտ ունեինք շատ, շատ տարիներ, ավելի քան 150 մլրդ դոլարի»,- ասել է նա՝ ավելացնելով, որ «շատ կզարմանա», եթե ինքն իրոք ստիպված լինի տուրքեր մտցնել։
2018 թվականին ԵՄ-ի հետ ԱՄՆ առեւտրի դեֆիցիտը կազմել է 109 մլրդ դոլար։
Համաձայն ԱՄՆ առեւտրի նախարարության վերջին տվյալների՝ ԵՄ ապրանքների եւ ծառայությունների արտահանումը ապահովել է մոտ 2,6 մլն աշխատատեղ։
Թրամփը համաձայնել է ֆոն դեր Լեյենի նախորդի՝ Ժան-Կլոդ Յունկերի հետ 2018 թվականին՝ բանակցություններ սկսել նոր առեւտրային գործարքով՝ խուսափելու համար տուրքեր մտցնելուց։
Այդ ժամանակվանից ԵՄ-ը համաձայնեցրել է բանակցությունների վարման նոր մանդատը, որպեսզի սկսի այդ առեւտրային բանակցությունները, բայց ԱՄՆ-ը դեռ չի տեղեկացրել, թե պատրաստ է սկսել դրանք։
«Ես կցանկանայի սպասել, մինչեւ որ ավարտեմ գործերը Չինաստանի հետ, ես չէի ցանկանա գործ ունենալ Չինաստանի եւ Եվրոպայի հետ միաժամանակ»,- ասել է Թրամփը CNBC-ին։
«Անկեղծ ասած, Ժան-Կլոդն իմ ընկերն էր, բայց նրա հետ անհնար էր գործ ունենալ։ Սկզբում ես ցանկանում էին հարցերը լուծել Մեքսիկայի եւ Կանադայի հետ։ Հիմա, երբ դա արված է, մենք պատրաստվում ենք անցնել Եվրոպային»։
Թրամփը նաեւ հաստատել է, որ բանակցություններ են վարվում Մեծ Բրիտանիայի վարչապետ Բորիս Ջոնսոնի հետ հնարավոր երկկողմ առեւտրային գործարքի մասին՝ ԵՄ-ից հունվարի 31-ին Բրիտանիայի դուրս գալուց հետո։ «Բորիսը եւ ես ընկերներ ենք, եւ նա ցանկանում է գործարք կնքել, եւ դա նորմալ է։ Նրանք դա ցանկանում են, դա նրանց պետք է»,- ավելացրել է Թրամփը։
